Սննդի ազգային գործակալություն. Մանկապարտեզներից վերցված 370 սննդի նմուշներում խախտումներ չեն հայտնաբերվել
Սննդի ազգային գործակալության տվյալներով՝ մանկապարտեզներում սննդի անվտանգության պետական վերահսկողության շրջանակներում լաբորատոր փորձարկման համար վերցվել է տարբեր կենդանական և ոչ կենդանական սննդամթերքի 694 նմուշ։
Գործակալության տվյալներով՝ այս փուլում հայտնի են 370 նմուշների հետազոտության արդյունքները՝ դրանք բոլորը համապատասխանում են սահմանված սննդի անվտանգության չափանիշներին։
Ինչպես նշվում է Սննդի ազգային գործակալության հայտարարության մեջ, մոնիթորինգի շրջանակներում լաբորատորիայում փորձարկվում են տարբեր տեսակի սննդամթերքներ, այդ թվում՝ մրգեր և բանջարեղեն, կաթնամթերք (պանիր, կաթի փոշի, ուլտրա-պաստերիզացված խմելու կաթ, սերուցքային կարագ, թթվասեր), միս և մսամթերք (տավարի և հավի միս), հացահատիկայիններ, պատրաստի կերակուրներ և խմելու ջուր։ Հետազոտությունները կատարվում են այնպիսի ցուցանիշների վրա, ինչպիսիք են՝ ծանր մետաղները, նիտրատները, մանրէաբանական պարամետրերը և հարուցիչները (աէրոբ միկրոօրգանիզմներ, կոլիֆորմներ, սալմոնելա, շիգելա, կոագուլազ-դրական ստաֆիլոկոկ)։
Մնացած նմուշների հետազոտության արդյունքները կհրապարակվեն աստիճանաբար։