«Սի Էն Էն» – Հյուսիսային Կորեան պլանավորում է 30,000 զինվոր ուղարկել Ռուսաստանի զինված ուժերը հզորացնելու համար
Հյուսիսային Կորեան պլանավորում է 30,000 զինվոր ուղարկել Ռուսաստանի զինված ուժերը հզորացնելու համար,- հաղորդում է «Սի Էն Էն»-ը՝ հղում անելով ուկրաինացի պաշտոնյաներին։
Ուկրաինայի պաշտպանության նախարարության հետախուզական ծառայության հաղորդագրության համաձայն՝ հյուսիսկորեացի զինվորները կարող են Ռուսաստան ժամանել առաջիկա ամիսներին։ Ուկրաինայի հետախուզական ծառայության հաղորդմամբ, Ռուսաստանի պաշտպանության նախարարությունը կարող է ապահովել «անհրաժեշտ սարքավորումները, զենքը և զինամթերքը» «ռուսական մարտական ստորաբաժանումների հետ հետագա ինտեգրման» համար։
Փաստաթղթի համաձայն՝ «մեծ հավանականություն կա», որ հյուսիսկորեական զորքերը կմասնակցեն Ուկրաինայի Ռուսաստանի կողմից օկուպացված հատվածներում մարտական գործողություններին՝ «ռուսական զորակազմը հզորացնելու համար, այդ թվում՝ լայնածավալ հարձակողական գործողությունների ժամանակ»։
Անցյալ տարվա նոյեմբերին Հյուսիսային Կորեան Ռուսաստան ուղարկեց 11,000 զինվոր՝ Ռուսաստանի Կուրսկի շրջանում Ուկրաինայի ներխուժումը հետ մղելու ռուսական ուժերին օգնելու համար։
Արևմտյան պաշտոնյաների տվյալներով՝ մարտադաշտում զոհվել կամ վիրավորվել է մոտ 4,000 հյուսիսկորեացի զինվոր։