Բողոքի ցույցեր Ֆրանսիայում․ «Մոամբե»՝ Փարիզից
Ֆրանսիայում լայնածավալ սոցիալական անկարգություններ են. Փարիզում փակվել են խոշոր զբոսաշրջային վայրեր, ինչպես նաև բազմաթիվ խանութներ։
Արդեն մի քանի ժամ է՝ երկրի հանրային հատվածի որոշ ոլորտներ գործադուլ են անում. համազգային այս գործողությունն ուղեկցվում է զանգվածային բողոքի ցույցերով Փարիզում և բազմաթիվ այլ քաղաքներում։ Դպրոցականներ, ուսանողներ և տարբեր մասնագիտական ոլորտների ներկայացուցիչներ դուրս են եկել փողոց՝ մասնակցելու արհմիությունների և երիտասարդական շարժումների կազմակերպած ցույցերին։ Հասարակական կարգը պահպանելու և հոկտեմբերի 17-18-ի իրադարձությունների կրկնությունը կանխելու նպատակով ձեռնարկվել են անվտանգության հատուկ միջոցառումներ, որոնք երեկ համաձայնեցվել էին Ֆրանսիայի նախագահի հետ անմիջական խորհրդակցությունների ընթացքում։ Մայրաքաղաքում և այլ քաղաքներում լայնորեն մոբիլիզացվել են իրավապահ մարմինները։ Բողոքի ակցիաներն ուղեկցվում են ոստիկանության հետ հաճախակի բախումներով, ճանապարհների փակմամբ և ուսումնական հաստատությունների շենքերի մուտքերի արգելափակմամբ։ Իրավիճակն առավել լարված է Փարիզում, Լիոնում և Մարսելում։ Իշխանությունները նախազգուշացրել են, որ բռնության ցանկացած դրսևորում կարժանանա ամենախիստ հակազդեցության։ Դպրոցական բարեփոխումներ, գերծանրաբեռնված դասարանների խնդրի լուծում, կենսաթոշակների և աշխատավարձերի բարձրացում, կյանքի թանկության նվազեցում, ինչպես նաև հաջորդ տարվա բյուջեի վերանայում. ահա այն պահանջները, որոնք միավորում են փողոց դուրս եկած տասնյակ հազարավոր քաղաքացիներին։ Փարիզում հիմնական ցույցը մեկնարկել է Հանրապետության հրապարակից (Place de la République) և շարժվում է դեպի Ազգի հրապարակ (Place de la Nation)։
Համընդհանուր գործադուլ և 70 000 ոստիկան փողոցներում. ուղիղ կապ ենք հաստատում Փարիզի հետ, որտեղից հաղորդում է Լևան Ախալայան։