Կարևոր է, որ բոլոր անձինք, ովքեր մեղադրվում են բիզնեսմեն Լևան Ջանգվելաձեի սպանության մեջ, ձերբակալվեն։ Փարձխալաձեն Ռուսաստանի քաղաքացի է, ինչը բարդացնում է արտահանձնման գործընթացը, սակայն կարևոր է, որ բոլոր հանցագործները պատասխանատվության ենթարկվեն։ Այս մասին հայտարարել է Վրաստանի խորհրդարանի նախագահ Շալվա Պապուաշվիլին։

Պապուաշվիլին շնորհակալություն է հայտնել Վրաստանի քննչական մարմիններին գործի բացահայտման համար։

«Իհարկե, դա ծանր դեպք էր, երբ պատվերով սպանություն կատարվեց Թբիլիսիի կենտրոնում։ Շնորհակալություն մեր իրավապահ մարմիններին, ովքեր շատ մանրամասն աշխատեցին։ Սա ամբողջությամբ բարդ քննչական գործընթաց էր, քանի որ տեսնում էինք՝ տարբեր անձինք էին ներգրավված։ Այդ թվում հաստատվեց, որ այս սպանության կազմակերպիչը գտնվում է երկրի սահմաններից դուրս։ Կային դեպքեր, երբ միմյանց ծածկում էին։ Տեսնում էինք, որ ձերբակալված կատարողները ցուցմունքներ չէին տալիս։ Վերջապես, քննչական մարմիններն ամբողջական պատկերը բացահայտեցին։ Ներքին գործերի նախարարության հայտարարությունից տեսանք, թե ով էր կազմակերպիչը, կատարողը և որն էր շարժառիթը։ Ուստի շնորհակալություն մեր իրավապահներին՝ այս շատ ծանր ու բարդ գործի բացահայտման համար։

Այժմ կարևոր է, որ սպանության մեջ մեղադրվող բոլոր անձինք ձերբակալվեն։ Գիտենք, որ մի քանի մարդ թաքնվում է տարբեր վայրերում․ ոմանք՝ Եվրոպայում, մյուսները՝ Ռուսաստանում։ Փարձխալաձեի վերաբերյալ գիտենք, որ նա կորցրել է Վրաստանի քաղաքացիությունը և հանդիսանում է Ռուսաստանի քաղաքացի, ինչը, իհարկե, բարդացնում է արտահանձնման գործընթացը։ Սակայն կարևոր է, որ բոլոր հանցագործները պատասխանատվություն կրեն», – հայտարարել է Պապուաշվիլին։

Բիզնեսմեն Լևան Ջանգվելաձեի սպանության կազմակերպիչ էր անվանվել Վրաստանի նախկին գլխավոր դատախազ Օթար Փարձխալաձեն։