Այս ընտրությունները կլինեն փորձություն՝ տեսնելու, թե ով է հարգում վրաց ժողովրդի ինքնիշխանությունը, և ով՝ միայն խինկալին,- այս մասին սոցիալական ցանցերում գրում է Վրաստանի խորհրդարանի նախագահ Շալվա Պապուաշվիլին։

Ինչպես նշում է Պապուաշվիլին, վերջին խորհրդարանական ընտրությունների ժամանակ մենք տեսանք օտարերկրյա քաղաքական գործիչների և դիվանագետների չափազանց մեծ մասնակցություն նախընտրական քարոզչությանը, որը չպետք է կրկնվի։

Բացի այդ, Վրաստանի խորհրդարանի նախագահը կոչ է անում Վրաստանում հավատարմագրված օտարերկրյա դիվանագետներին հարգել Վիեննայի կոնվենցիան և հարգել Վրաստանի օրենսդրությունը։

«Այսօր Վրաստանի նախագահը նշանակել է տեղական ինքնակառավարման մարմինների ընտրություններ։ Այսօր ուժի մեջ են մտել նախընտրական քարոզարշավին վերաբերող կանոնակարգերը, որոնք, ի թիվս այլ հարցերի, վերաբերում են ընտրական սուբյեկտի օգտին կամ դեմ քարոզչությանը մասնակցելուն։ Ընտրական օրենսդրությունը վերաբերում է Վրաստանում գտնվող բոլոր անձանց, այդ թվում՝ դիվանագետներին։ Վիեննայի կոնվենցիայի 41-րդ հոդվածի համաձայն՝ դիվանագետները «պարտավոր են հարգել ընդունող պետության օրենքները։ Նրանք նաև պարտավոր են չմիջամտել այդ պետության ներքին գործերին»։

Ցավոք, վերջին խորհրդարանական ընտրությունների ժամանակ մենք տեսանք օտարերկրյա քաղաքական գործիչների և դիվանագետների չափազանց մեծ մասնակցություն նախընտրական քարոզչությանը՝ թե՛ հայտարարությունների, թե՛ քարոզչության ֆինանսավորման միջոցով, ինչը Վիեննայի կոնվենցիայի և վրացական օրենսդրության կոպիտ խախտում էր։ Սա չպետք է կրկնվի։ Հետևաբար, ես հատկապես կոչ եմ անում Վրաստանում հավատարմագրված օտարերկրյա դիվանագետներին հետևել Վիեննայի կոնվենցիային, հարգել Վրաստանի օրենսդրությունը և վրաց ժողովրդի՝ առանց արտաքին միջամտության սեփական ընտրություն կատարելու իրավունքը։

Այս ընտրությունները կլինեն փորձություն՝ տեսնելու, թե ով է հարգում վրաց ժողովրդի ինքնիշխանությունը, և ով՝ միայն խինկալին։ Մենք մանրամասն կհետևենք այս հարցին», – գրում է Պապուաշվիլին։