Ուժայինները մտել են Սանկտ Պետերբուրգում գտնվող «Վագներ կենտրոն» մասնավոր ռազմական ընկերության գրասենյակ։ Այդ մասին տեղեկությունը տարածել են տեղական լրատվամիջոցները։

Լրատվամիջոցի տեղեկություններով՝ շենքը, ամենայն հավանականությամբ, կխուզարկվի։ Տարածված տեսանյութերում և լուսանկարներում երևում է, որ «Վագներ կենտրոն» մասնավոր ռազմական ընկերության շենքի մոտ կանգնած են Ռոսգվարդիայի և հատուկ նշանակության ջոկատի (Օմոն) ավտոբուսները։ Շենքի մոտ են գտնվում ՌԴ ՆԳՆ զինված աշխատակիցները։

Երեկ «Վագների» հիմնադիր Եվգենի Պրիգոժինը ռուսական ռազմական ղեկավարությանը մեղադրել է իր մարտիկների ճամբարների վրա հարձակումներ իրականացնելու մեջ։ Պրիգոժինն ասել է, որ սկսում է Արդարության երթ դեպի Մոսկվա՝ դադարեցնելու «երկրի ռազմական ղեկավարության կողմից իրականացվող չարիքը»։ ՌԴ Անվտանգության ծառայությունը քրեական գործ է հարուցել Եվգենի Պրիգոժինի դեմ՝ ռազմական ապստամբություն հրահրելու մեղադրանքով։