Ռոբերտ Ֆիցո. Հայաստանի և Ադրբեջանի միջև հակամարտության խաղաղ կարգավորումը Եվրոպային ուժեղ ազդանշան կհղեր այն մասին, որ հակամարտությունները կարող են լուծվել դիվանագիտական երկխոսության միջոցով
Հայաստանի և Ադրբեջանի միջև հակամարտության խաղաղ կարգավորումը Եվրոպային հզոր ազդանշան կհղեր այն մասին, որ հակամարտությունները կարող են լուծվել դիվանագիտական երկխոսության միջոցով, ասել է Սլովակիայի վարչապետ Ռոբերտ Ֆիցոն, ով այցով գտնվում է Երևանում։
Ռոբերտ Ֆիցոյի խոսքով՝ կարևոր է, որ Հայաստանն ու Ադրբեջանը գործընթացն ավարտեն սահուն։
«Ես կցանկանայի շնորհակալություն հայտնել վարչապետին Ադրբեջանի հետ վերջնական խաղաղության համաձայնագրի հասնելու ջանքերում իր առաջնորդության համար: Շատ շնորհակալ եմ օգտակար, բազմազան տեղեկատվության համար, որը դուք հենց նոր տրամադրեցիք մեզ բոլորիս: Այս տարի արված հայտարարությունը կարևոր քայլ էր տարածաշրջանում կայուն խաղաղության և անվտանգության համար: Կարևոր է պահպանել այս թափը և ապահովել, որ երկու կողմերն էլ սահուն ավարտեն գործընթացը», – ասել է Ռոբերտ Ֆիցոն:
Բացի այդ, Ֆիցոն կենտրոնացավ նաև Սլովակիայի և Հայաստանի միջև առևտրային հարաբերությունների վրա։
«Մենք կիսում ենք ընդհանուր քրիստոնեական ժառանգություն։ Հայաստանը Սլովակիայի հիմնական առևտրային գործընկերն է տարածաշրջանում, և մեր առևտուրն աճում է։ Ես կցանկանայի լրացուցիչ խթան հաղորդել մեր առևտրի ընդլայնմանը, մասնավորապես՝ ատոմային էներգիայի, ավտոմոբիլային արդյունաբերության, պաշտպանության և զբոսաշրջության ոլորտներում։ Ես կարծում եմ, որ վարչապետը բավարար ժամանակ կունենա քննարկելու համագործակցության այս բոլոր ասպեկտներն ու հեռանկարները։ Ավելի ուժեղ աջակցության դեպքում Հայաստանի հարաբերությունները ԵՄ-ի հետ ավելի սերտ կդառնան։ Սլովակիան պատրաստ է կիսվել իր փորձով բարդ շուկայական և սոցիալական բարեփոխումների իրականացման գործում՝ նպաստելու Եվրամիություն-Հայաստան համապարփակ և ընդլայնված գործընկերության համաձայնագրի և վիզաների ազատականացման երկխոսության ներուժի լիարժեք իրացմանը», – նշել է Ֆիցոն։
Սլովակիայի վարչապետը նաև ողջունում է Եվրամիության մոնիթորինգային առաքելության ներկայությունը Հայաստանում։