Թբիլիսիի քաղաքային դատարանի դատավոր Արսեն Կալատոզիշվիլին որպես խափանման միջոց կալանք է կիրառել յոթ անձանց նկատմամբ, ովքեր մեղադրվում են ռազմավարական և առանձնահատուկ նշանակության օբյեկտը խմբով զավթելու փորձի և խմբակային բռնությանը մասնակցելու համար։

Այսօրվա նիստում քննարկվել է Մամուկա Լաբուչիձեի, Կոնստանտինե Կոկաիայի, Վլադիմեր Գվելեսիանի, Նիկա Գվենձաձեի, Գուրիել Քարդավայի, Զուրա Չավչանիձեի և Կոբա Էպիտաշվիլի նկատմամբ խափանման միջոցի կիրառման հարցը։

Մեղադրող կողմը պահանջում էր կիրառել կալանք, իսկ պաշտպանները միջնորդում էին նրանց ազատ արձակել առանց խափանման միջոցի, կամ էլ որպես այլընտրանք առաջարկում էին գրավ։

Գործով նախնական դատական նիստը կկայանա հոկտեմբերի 27-ին։

Հիշեցնենք, որ մեղադրյալները ձերբակալվել են հոկտեմբերի 7-ին և 8-ին՝ դատավորի որոշման հիման վրա։

Կոբա Էպիտաշվիլին մեղադրվում է Վրաստանի քրեական օրենսգրքի 225-րդ հոդվածի երկրորդ մասով (խմբակային բռնության մասնակցություն), ինչը նախատեսում է ազատազրկում մինչև վեց տարի ժամկետով։

Մամուկա Լաբուչիձեին, Կոնստանտինե Կոկաիային, Վլադիմեր Գվելեսիանին, Նիկա Գվենձաձեին, Գուրիել Քարդավային և Զուրա Չավչանիձեին ներկայացվել են մեղադրանքներ Վրաստանի քրեական օրենսգրքի 19-222-րդ հոդվածի երկրորդ մասի «ա» ենթակետով (ռազմավարական և առանձնահատուկ նշանակության օբյեկտը խմբով զավթելու փորձ) և 225-րդ հոդվածի երկրորդ մասով (խմբակային բռնության մասնակցություն), ինչը նախատեսում է մինչև վեց տարի ազատազրկում։