Վրաստանի պետական անվտանգության ծառայությունը հրապարակել է այն անձանց անունները, որոնց տները խուզարկվել են Իրակլի Ղարիբաշվիլիի, Գրիգոլ Լիլուաշվիլիի և Օթար Փարծխալաձեի բնակարանների հետ միաժամանակ։

Սրանք են՝ Ռոմեո Միքաութաձե, Միխեիլ Չոխելի, Վանո և Թորնիկե Պարկաուլներ, Անդրია (նույն ինքը՝ Սանդրո) Լիլուաշվիլի և նրանց ընտանիքի անդամներ։

Ինչպես հայտարարում են ՊԱԾ-ում, հոկտեմբերի 17-ին, առավոտյան 10:00-ից սկսած, ամբողջ երկրի տարածքում խուզարկվել է 24 բնակարան և տուն, իրականացվել են նաև անձնական խուզարկություններ։ Գործողությունները տեղի են ունեցել Թբիլիսիում, ինչպես նաև Դեդոփլիսցղարոյի, Վանիի, Չոխաթաուրիի և Բորժոմիի շրջաններում։

«Խուզարկվել են հետևյալ անձանց բնակարանները՝ Իրակլի Ղարիբաշվիլի, Գրիգոլ Լիլուաշվիլի, Օթար Փարծխալաձե, Ռոմեո Միքաութաձե, Միխեիլ Չոխելի, Վանո և Թորնիկե Պարկաուլներ, Անդրია (Սանդրո) Լիլուաշվիլի և նրանց ընտանիքի անդամներ։

Արդյունքում առգրավվել է կանխիկ գումար՝ ընդհանուր 7 002 200 ԱՄՆ դոլար և 136 000 լարի, 198 միավոր թանկարժեք իր և ժամացույց, արժեքավոր նկարներ, մի քանի հազար էջ փաստաթղթեր, 50 բջջային հեռախոս և 119 էլեկտրոնային սարք։ Ներկայումս ՊԱԾ-ի և Վրաստանի գլխավոր դատախազության քննչական բաժնի աշխատակիցները համատեղ ինտենսիվ աշխատում են փաստաթղթերի և սարքերում առկա տեղեկատվության ուսումնասիրության ուղղությամբ։ Բացի այդ, կատարվում է առգրավված կանխիկ գումարի իրական աղբյուրի որոշում, ինչից հետո պլանավորվելու են հետագա քննչական-օպերատիվ միջոցառումներ և համապատասխան իրավական արձագանք», – ասված է ՊԱԾ հայտարարությունում։