Արտաքին հարաբերությունների կոմիտեի նախագահ Նիկոլոզ Սամխարաձեն հանդիպել է Լեհաստանի դիվանագիտական առաքելության ղեկավար Արտուր Գեբալին։

Վրաստանի խորհրդարանի մամուլի ծառայության հաղորդմամբ՝ հանդիպման ընթացքում կողմերը քննարկել են Վրաստան-Լեհաստան երկկողմ հարաբերությունները և համագործակցության զարգացման հնարավորությունները։

Նրանց տեղեկացմամբ՝ հատուկ ուշադրություն է դարձվել տարածաշրջանային անվտանգության հարցերին՝ ներառյալ Ռուսաստան-Ուկրաինա պատերազմը, Հայաստանի և Ադրբեջանի միջև առկա իրավիճակը, ինչպես նաև Մերձավոր Արևելքում ընթացող իրադարձությունները։

«Նիկոլոզ Սամխարաձեն լեհ դիվանագետի հետ խոսել է ներքաղաքական գործընթացների, Վրաստանի՝ ԵՄ-ին ինտեգրվելու հարցի, օկուպացված տարածքներում առկա բարդ իրավիճակի և օկուպացիայից բխող վտանգների մասին», — նշված է խորհրդարանի մամուլի հաղորդագրության մեջ։