Նիկոլ Փաշինյանը և Ռեջեփ Թայիփ Էրդողանը հեռախոսազրույցի ընթացքում քննարկել են հարաբերությունների կարգավորման հարցը
Հայաստանի վարչապետ Նիկոլ Փաշինյանը և Թուրքիայի նախագահ Ռեջեփ Թայիփ Էրդողանը հեռախոսազրույցի ընթացքում քննարկել են հարաբերությունների կարգավորման հարցը։
Տեղեկությունը տարածում է Հայաստանի վարչապետի վարչակազմը։
Վարչակազմի հաղորդմամբ, պետությունների ղեկավարներն ընդգծել են երկրների միջև հարաբերությունների կարգավորման երկկողմ գործընթացի կարևորությունը, որը կնպաստի նաև տարածաշրջանում խաղաղության և կայունության ամրապնդմանը։
Հայաստանի վարչապետի վարչակազմի փոխանցմամբ՝ այս համատեքստում առաջնորդները հույս են հայտնել, որ հուլիսի 1-ին երկու երկրների հատուկ ներկայացուցիչների հանդիպման ժամանակ ձեռք բերված պայմանավորվածությունները շուտով կյանքի կկոչվեն։
Բացի այդ, Հայաստանի վարչապետի վարչակազմի տարածած հաղորդագրության համաձայն՝ Հայաստանի վարչապետը շնորհավորել է Թուրքիայի առաջնորդին Ղուրբան Բայրամի տոնի առթիվ, իսկ Ռեջեփ Թայիփ Էրդողանն իր հերթին շնորհավորել է Հայաստանի վարչապետին՝ գալիք Վարդավառի տոնի առթիվ։