Վրաստանի Ներքին գործերի նախարարությունը ձերբակալել է ևս 16 անձի հոկտեմբերի 4-ին տեղի ունեցած դեպքերի կապակցությամբ, ընդհանուր ձերբակալվածների թիվը հասել է 62-ի։ Այս մասին հայտարարել է ՆԳ նախարար Գեկա Գելաձեն այսօր կայացած ճեպազրույցում։

Նախարարի խոսքով՝ հետաքննություն է սկսվել նաև արտասահմանում գտնվող երկու անձի նկատմամբ, որոնցից մեկը՝ Իրակլի Շայշմելաշվիլին, մեղադրվում է Վրաստանի սահմանադրական կարգը բռնությամբ փոխելու և պետական իշխանությունը տապալելու կոչերի համար։

«Ինչպես հայտնի է հասարակությանը, ՆԳՆ-ի Կենտրոնական քրեական ոստիկանության դեպարտամենտում ընթանում է ակտիվ հետաքննություն այն անձանց հայտնաբերելու և պատասխանատվության ենթարկելու նպատակով, ովքեր հոկտեմբերի 4-ին Թբիլիսիում կատարել են ապօրինի, հանցավոր գործողություններ. մասնավորապես՝ փորձել են բռնի մեթոդով գրավել Վրաստանի նախագահի պալատը և տապալել սահմանադրական կարգը, որի հետևանքով տասնյակ ոստիկաններ են տուժել», – հայտարարել է Գելաձեն։

Նրա խոսքով՝ ձերբակալվածների մի մասին մեղադրանք է առաջադրվել Վրաստանի սահմանադրական կարգի բռնի փոփոխության կամ պետական իշխանության տապալման կոչերի, ռազմավարական կամ հատուկ նշանակության օբյեկտներ գրավելու կամ արգելափակելու փորձի, խմբային բռնության կազմակերպման և մասնակցության, ինչպես նաև ոստիկանների հանդեպ բռնության համար։

Գելաձեն նաև շնորհակալություն է հայտնել իրավապահ մարմինների աշխատակիցներին հոկտեմբերի 4-ի իրադարձությունների ժամանակ ցուցաբերած բարձր պրոֆեսիոնալիզմի և հասարակական կարգի պահպանման համար։

«Ամբողջ աշխարհը հստակ տեսավ, որ ՆԳՆ-ի յուրաքանչյուր աշխատակից գործեց բարձրագույն ստանդարտներով՝ օրենքի շրջանակներում։ Դա ճիշտ և պատշաճ կերպով իրականացված ոստիկանության գործողություն էր, որի արդյունքում կանխվեց պետության տապալման փորձը։ Մենք ամենախիստ միջոցներ կձեռնարկենք բոլոր նրանց դեմ, ովքեր կփորձեն խաթարել մեր երկրի կայունությունը և օրենքի գերակայությունը», – եզրափակել է Գելաձեն։