ՆԱՏՕ-ում գոյություն ունի համագործակցության մոդել, այդ թվում ՈՒկրաինայի և Վրաստանի հետ, որտեղ առաջնահերթությունները սահմանվում են գործընկերների պահանջներով, այն բանի փոխարեն, որ նախաձեռնությունները գան դաշինքից. ՈՒես Միտչել
ՆԱՏՕ-ում գոյություն ունի համագործակցության մոդել, այդ թվում ՈՒկրաինայի և Վրաստանի հետ, որտեղ առաջնահերթությունները սահմանվում են գործընկերների պահանջներով, այն բանի փոխարեն, որ նախաձեռնությունները գան դաշինքից,- այս հայտարարությունը ՆԱՏՕ-ի գլխավոր քարտուղարի նախաձեռնությամբ ստեղծված փորձգետների խմբի անդամ, ՈՒես Միտչելը, արել է առցանց կոնֆերանսին, որի մասնակիցները զրուցել են դաշինքի ապագա ռազմավարության շուրջ և քննարկել հանձնարարական՝ «ՆԱՏՕ 2030» զեկույցը:
Ինչպես հայտարարել է Միտչելը, ՆԱՏՕ-ն չի կարող ռազմավարականորեն օգտագործել Վրաստանի ու Ուկրաինայի հետ համագործակցությունը:
«Մեր խմբի համար այս զեկույցը հնարավորություն է տվել հստակ փոխանցել ՆԱՏՕ-ի կողմնորոշումը մեր Արևելյան գործընկերներին: Նախ նշենք, որ զեկույցի հնչեղությունն ու բովանդակությունը հստակ են և հաստատում են աջակցությունը բաց դռների քաղաքականության, այդ երկրների արևմտյան հեռանկարի և Վրաստանի և Ուկրաինայի ՆԱՏՕ տանող ճանապարհին: Զեկույցում ասվում է նաև, որ ՆԱՏՕ-ի դաշնակիցները պետք է էապես աջակցեն խոցելի ժողովրդավարական երկրներին, ինչպիսիք են Վրաստանը և Ուկրաինան, որոնք գտնվում են Ռուսաստանի կողմից ճնշման տակ:
Երկրորդ և ամենակարևորը, որը ես կցանկանայի ընդգծել, այն է, որ զեկույցում կառուցողական քննադատություն է արտահայտված այն մասին, թե ինչպես է ՆԱՏՕ-ն ներկայումս իրականացնում այդ գործընկերությունը: Այսօր ՆԱՏՕ-ում առկա է համագործակցության մի մոդել, այդ թվում `Ուկրաինայի և Վրաստանի հետ, որտեղ գործընկերության առաջնահերթությունները և գործողությունները որոշվում են հենց գործընկերների կողմից սահմանված պահանջներով, փոխանակ դա առաջարկի ՆԱՏՕ-ն: Մենք ունենք նաև քաոսային ֆինանսավորման աղբյուրներ այս գործընկերների համար: Ֆինանսավորման կայուն և հիմնական աղբյուր գոյություն չունի: Հիմնականում այդ ֆինանսավորումը կամավոր հատկացվում է այն գործընկերների կողմից, ովքեր շահագրգռված են համագործակցել որոշակի երկրների հետ: Այս ամենը նշանակում է, որ ՆԱՏՕ-ն գործընկերությունն օգտագործում է ոչ ռազմավարական: Մեր զեկույցում նույնիսկ ասվում է, որ ռազմավարական մրցակցության դարաշրջանում համագործակցությունն ու գործընկերությունը պետք է օգտագործվեն ռազմավարական առումով: Եթե ՆԱՏՕ-ն ցանկանում է խորացնել համագործակցությունը Վրաստանի հետ, ապա այն պետք է սկսի գործընկերների հետ ֆինանսավորման և հաղորդակցման ավելի համակարգված և ռազմավարական մոտեցմամբ»,- հայտարարել է Միտչելը:
Հիշեցնենք, որ Ուես Միտչելը ԱՄՆ-ի նախկին պետքարտուղարի օգնականն էր, աշխատում էր Եվրոպայի և Եվրասիայի հարցերով: Նա ՆԱՏՕ-ի ապագա զարգացման և բարեփոխումների վերաբերյալ պատրաստված հանձնարարական զեկույցի հեղինակներից մեկն է:
ՆԱՏՕ-ի գլխավոր քարտուղարը մի խումբ փորձագետների հանձնարարել է զեկույց պատրաստել ՆԱՏՕ-ի բարեփոխումների և զարգացման վերաբերյալ այն բանից հետո, երբ Ֆրանսիայի նախագահ Էմանուել Մակրոնը կտրուկ քննադատեց Հյուսիսատլանտյան դաշինքը: Էկոնոմիստին տված հարցազրույցում Մակրոնն ասել է, որ «ՆԱՏՕ-ի ուղեղը մեռնում է»:
