Թբիլիսիի Մետաքսի ճանապարհի ֆորումի շրջանակում առաջին անգամ կանցկացվի «Թբիլիսիի ֆինանսական գագաթնաժողովը»։

Գագաթնաժողովը համատեղ կազմակերպել են Վրաստանի Ազգային բանկը, Տնտեսության նախարարությունը և Սինգապուրի Գլոբալ ֆինանսական և տեխնոլոգիական ցանցը (GFTN)։ Միջոցառմանը մասնակցելու են տարբեր երկրների կենտրոնական բանկերի ղեկավարներ, ֆինանսական ոլորտի առաջնորդներ, խոշոր ընկերությունների ներկայացուցիչներ և փորձագետներ։

Վրաստանի Ազգային բանկի նախագահ Նաթիա Թուրնավայի խոսքով՝ գագաթնաժողովին կհրավիրվի շուրջ 1000 պատվիրակ։

«Թբիլիսիի ֆինանսական գագաթնաժողովը կընդունի մոտ 1000 հյուրերի, որոնք կժամանեն Վրաստան ավելի քան 50 երկրներից։ Նրանց թվում կլինեն ֆինանսական ոլորտի առաջնորդներ և բիզնեսի ներկայացուցիչներ։ Քննարկումները կանցկացվեն Մետաքսի ճանապարհի ֆորումի ձևաչափով և ընդգրկելու են մեր տարածաշրջանը՝ որպես կամուրջ Եվրոպայի և Ասիայի միջև։ Մենք ունենք հնարավորությունն ու հավակնությունը՝ Վրաստանը դարձնելու ոչ միայն լոգիստիկ, առևտրային և էներգետիկ, այլև ֆինանսական հանգույց տարածաշրջանի համար», – հայտարարել է Նաթիա Թուրնավան։

Միջոցառումը կանցկացվի հոկտեմբերի 22-23-ին։ Ազգային բանկի տեղեկացմամբ՝ գագաթնաժողովի մասնակիցները հնարավորություն կունենան քննարկելու նորագույն ֆինանսական նորարարություններ, տարածաշրջանային զարգացման հեռանկարներ և միջազգային ֆինանսական համագործակցության հարցեր։