Մենք շահագրգռված ենք տարածաշրջանում խաղաղությամբ և կայունությամբ, Վրաստանը միշտ մոտիվացված է այս գործընթացում կարևոր դերերից մեկը խաղալու համար,- այս մասին Վրաստանի և Հայաստանի միջկառավարական տնտեսական հանձնաժողովի նիստում հայտարարել է Վրաստանի վարչապետ Իրակլի Ղարիբաշվիլին:

Նա ասել է, որ Վրաստանի և Հայաստանի հարաբերությունները գտնվում են ամենաբարձր մակարդակի վրա և նշել, որ Վրաստանը միշտ պատրաստ է նպաստել տարածաշրջանում խաղաղության և կայունության զարգացմանը։

«Ողջունում եմ իմ ընկերոջը՝ վարչապետ Նիկոլ Փաշինյանին Թբիլիսիում։ Սա ձեր երկրորդ այցն է Վրաստան։ Նաև գոհունակությամբ ուզում եմ ասել, որ պաշտոնական այցով երկու անգամ եղել եմ Երևանում։ Դա իսկապես վկայում է մեր միջև սերտ համագործակցության և բարի կամքի մասին։ Ուզում եմ շնորհակալություն հայտնել այս վերաբերմունքի համար։ Ցանկանում եմ նաև շնորհակալություն հայտնել, որ մեր նախաձեռնությամբ և բանակցություններով է, որ այսօր կայացած միջկառավարական տնտեսական հանձնաժողովի նիստն արդեն անցկացվում է վարչապետների մակարդակով։ Այս հանձնաժողովը նորացվել է Ձեր անձնական ներգրավվածությամբ, որը տարիներ շարունակ չի կայացել։

Մենք շահագրգռված ենք մեր միջև եղած շատ սերտ, բարեկամական համագործակցությունն այժմ վերածել իրական գործի: Պետք է զարգացնենք առևտրատնտեսական հարաբերությունները, խոսենք տարածաշրջանային նախագծերի, ենթակառուցվածքների, այլ նախագծերի մասին, որոնք հետաքրքիր կլինեն երկու երկրների համար, և դրա համար մենք այսօր հավաքվել ենք։

Մեր հարաբերությունները ամենաբարձր մակարդակի վրա են։ Հպարտությամբ ու հաճույքով կարելի է ասել, որ մեր երկրների միջև նման հարաբերություն երբեք չի եղել։ Մենք միշտ ունեցել ենք մտերիմ բարեկամական հարաբերություններ, բայց կարելի է ասել, որ մեր արժանիքն է, որ երկրների միջև, կառավարությունների միջև թյուրիմացություն չկա, և մենք իսկապես իդեալական հարաբերություններ ունենք։

Միաժամանակ մենք շահագրգռված ենք տարածաշրջանում խաղաղությամբ և կայունությամբ։ Վրաստանը միշտ մոտիվացված է խաղալու այս գործընթացում կարևորագույն դերերից մեկը, և այդ նպատակով, ինչպես գիտեք, ես հնչեցրել եմ խաղաղ հարևանության նախաձեռնությունը։ Ես ցանկանում եմ վերահաստատել, պարոն վարչապետ, որ մենք միշտ պատրաստ ենք մասնակցել ողջ տարածաշրջանում և նպաստել խաղաղության և կայունության զարգացմանը», – ասել է Իրակլի Ղարիբաշվիլին։