Վրաստանի արտաքին գործերի նախարար Մակա Բոճորիշվիլին հանդիպել է ԱՄՆ Ներկայացուցիչների պալատի արտաքին հարաբերությունների հանձնաժողովի անդամների երկկուսակցական պատվիրակության հետ։ Տեղեկատվությունը հրապարակվել է Վրաստանի արտաքին գործերի նախարարության կողմից։

Նախարարության հաղորդմամբ, հանդիպման ընթացքում կողմերը քննարկել են վրաց-ամերիկյան հարաբերությունների արդիական հարցերը և տարածաշրջանում ընթացող գործընթացները։ Բացի այդ, ընդգծվել է տարածաշրջանում խաղաղության և կայուն զարգացման կարևորությունը, ինչպես նաև քննարկվել են Վրաստանում ընթացող գործընթացները։

«Հատուկ շեշտադրում է կատարվել Վրաստանի դերի վրա որպես տարածաշրջանային կապող օղակ, և այս առումով քննարկվել է Միջին միջանցքի տրանսպորտային ներուժը։ Վրաստանը ողջունել է ԱՄՆ-ի ակտիվ ներգրավվածությունը տարածաշրջանում։ Պատվիրակության անդամները նշել են ԱՄՆ-ի անվերապահ, երկկուսակցական աջակցությունը Վրաստանի ինքնիշխանությանը և տարածքային ամբողջականությանը, և հատուկ նշել են ԱՄՆ Կոնգրեսի ակտիվ ներգրավվածության դերը այս հարցում։ Զրույցի ընթացքում պատվիրակության անդամները ընդգծել են Վրաստանի դերը ինչպես համաշխարհային, այնպես էլ տարածաշրջանային քաղաքականության և անվտանգության հարցերում։

Արտաքին գործերի նախարարը ևս մեկ անգամ հաստատել է վրացական կողմի ցանկությունն ու պատրաստակամությունը՝ վերականգնելու հարաբերությունները Միացյալ Նահանգների հետ և վերականգնելու ռազմավարական գործընկերությունը», – ասվում է Արտաքին գործերի նախարարության հայտարարության մեջ։