ՄԱԿ-ում Չինաստանի դեսպան Ֆու Կոնգը դատապարտել է քաղաքացիական անձանց դեմ ուղղված ցանկացած հարձակում և կոչ է արել ուկրաինական և ռուսական կողմերին դադարեցնել քաղաքացիական անձանց և քաղաքացիական ենթակառուցվածքների վրա հարձակումները։

Ֆու Կոնգը նշել է, որ բոլոր կողմերը պետք է քաղաքական կամք ցուցաբերեն՝ Ռուսաստանի և Ուկրաինայի միջև համապարփակ և երկարատև խաղաղության համաձայնագրի հասնելու համար։

«Չինաստանը ստացել է Ստարոբելսկի դպրոցի վրա անօդաչու թռչող սարքի հարձակման մասին հաղորդագրություններ և խորը մտահոգություն է հայտնում հարձակման հետևանքով զոհերի, հատկապես աշակերտների շրջանում, համար։ Չինաստանը դատապարտում է անմեղ քաղաքացիական անձանց դեմ ուղղված ցանկացած հարձակում։ Ուկրաինայում երկարատև ճգնաժամը, մարտադաշտում իրավիճակի վատթարացումը և սովորական մարդկանց անսահման տառապանքները այն բաներն են, որոնք ոչ մի կողմ, այդ թվում՝ Չինաստանը, չի ցանկանում տեսնել», – ասել է Ֆու Կոնգը։

ՄԱԿ-ում Չինաստանի դեսպանը կոչ է արել կողմերին զսպվածություն ցուցաբերել և հարգել միջազգային մարդասիրական իրավունքը։ Նա նաև ասել է, որ Չինաստանի դիրքորոշումը Ուկրաինայի հարցում օբյեկտիվ է, անաչառ, և երկիրը պատրաստ է համագործակցել միջազգային հանրության հետ։ Չինաստանը նաև պատրաստ է շարունակել կառուցողական դեր խաղալ ճգնաժամը քաղաքական միջոցներով լուծելու գործում։

Ավելի վաղ Ռուսաստանի նախագահ Վլադիմիր Պուտինը մեղադրել է Ուկրաինային ուսանողական հանրակացարանի վրա հարձակման մեջ։ Լրատվամիջոցների հաղորդագրությունների համաձայն, Ռուսաստանի նախագահը հարձակումը, որի հետևանքով զոհվել է վեց և վիրավորվել 40 մարդ, անվանել է ահաբեկչական հարձակում և հրամայել է զինվորականներին պատրաստվել պատասխան միջոցառումների: