Մեծ Բրիտանիայի վարչապետ Քիր Սթարմերը հայտարարել է, որ Ռուսաստանի նկատմամբ նավթի վերաբերյալ գործող պատժամիջոցները կմնան ուժի մեջ, և որ նոր միջոցառումները կներառեն միայն փուլային բացառություններ։

Վարչապետը նշել է, որ իր հայտարարությունները սխալ են հասկացվել, և որ Մեծ Բրիտանիան չունի Ռուսաստանի նկատմամբ գործող պատժամիջոցները մեղմացնելու ծրագրեր։

«Ես իսկապես կարծում եմ, որ տեղի ունեցողի սխալ ընկալումը և աղավաղումը շատ լուրջ հարց է։ Սրանք նոր արգելքներ են, սրանք նոր պատժամիջոցներ են, սրանք երեկվանից հեղուկացված բնական գազի ծովային ծառայությունների նոր արգելքներ են։ Դրանք փուլ առ փուլ կներդրվեն, ինչպես նախորդ պատժամիջոցների ռեժիմները փուլ առ փուլ ներդրվեցին, ինչպես նախորդ կառավարությունն էր անում։ Այլ երկրներն էլ անում են ճիշտ նույնը, Եվրամիությունն ունի դա անելու իր սեփական ձևը։ Ավստրալիան և Կանադան ունեն դա անելու իրենց սեփական ձևը», – ասել է Սթարմերը։

Սթարմերը հայտարարությունն արել է այն բանից հետո, երբ ընդդիմադիր կուսակցությունները խստորեն քննադատել են կառավարության որոշումը՝ մեղմելու ռուսական հում նավթից արտադրվող ավիացիոն վառելիքի և դիզելային վառելիքի նկատմամբ պատժամիջոցները։

Նախկինում լրատվամիջոցներում հաղորդվել էր, որ Մեծ Բրիտանիայի կառավարությունը մեղմացրել է ռուսական նավթի նկատմամբ պատժամիջոցները, որը երրորդ երկրներում վերամշակվում է դիզելային վառելիքի և ավիացիոն վառելիքի։