Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Կայա Կալասը նշել է, որ Սևծովյան տարածաշրջանը ռազմավարական նշանակություն ունի ԵՄ-ի համար, քանի որ այն կապում է Եվրոպան և Կենտրոնական Ասիան։

Նրա խոսքով՝ Սև ծովի անվտանգությունը կենսական նշանակություն ունի Եվրոպայի անվտանգության համար։

Կայա Կալասի խոսքով՝ Սևծովյան տարածաշրջանի երկրները ամրապնդում են իրենց կապերը ԵՄ-ի հետ։

«Սևծովյան տարածաշրջանը ռազմավարական նշանակություն ունի ԵՄ-ի համար, քանի որ այն կապում է Կենտրոնական Ասիան և Եվրոպան։ Այն կարևոր է անվտանգության, առևտրի և էներգետիկայի առումով, ինչպես նաև հաշվի առնելով, որ տարածաշրջանի երկրները ամրապնդում են իրենց կապերը ԵՄ-ի հետ։ Կա աշխարհաքաղաքական տեղաշարժերի զգացողություն։ Ուկրաինան և Մոլդովան շարժվում են դեպի ԵՄ անդամակցություն։ Նույնը վերաբերում է նաև Վրաստանին, եթե այն վերադառնա ԵՄ ուղուն։ Թուրքիան նույնպես կարևոր գործընկեր և թեկնածու երկիր է, չնայած տարածաշրջանի ներուժը ստվերվում է Ռուսաստանի պատերազմի, օդային տարածքի հաճախակի խախտումների, նավահանգիստների և ծովային ուղիների վրա հարձակումների պատճառով», – ասել է Կալասը։

Եվրոպացի դիվանագետի խոսքով՝ Սևծովյան նոր ռազմավարությունը յուրատեսակ հրավեր է Սևծովյան երկրների համար՝ ամրապնդելու համագործակցությունը։ Կալասը նշեց, որ ԵՄ-ն հանձնառու է Սևծովյան տարածաշրջանի գործընկերների հետ սերտ համագործակցությանը և տեղեկատվության փոխանակմանը: Կայա Կալասի խոսքով՝ Սևծովյան բոլոր երկրները կարող են օգտվել այս ռազմավարությունից: