Նոր տարվա գալահամերգը հեռուստատեսային ձևաչափով կլինի, և հեռուստադիտողը կդիտի այն այս գիշեր։ Այս մասին հայտարարել է Թբիլիսիի քաղաքապետ Կախա Կալաձեն՝ սոցիալական ցանցում տարածած տեսաուղերձում։

Նրա խոսքով՝ գալահամերգը մի կողմից նվեր է բնակչությանը, իսկ մյուս կողմից՝ աջակցություն վրացի երաժիշտներին։

«Նոր տարվա գալահամերգը այս տարի կլինի հեռուստատեսային ձևաչափով, և հեռուստադիտողը կդիտի այն այս գիշեր։ Գալահամերգը մի կողմից նվեր է բնակչության համար, մյուս կողմից՝ աջակցություն և օգնություն վրացի երաժիշտներին ու երգիչներին։ Կարծում եմ՝ ավելորդ է բացատրել, թե ինչու է այն անցկացվում հեռուստատեսային ձևաչափով։ Այս տոնական պահերին ծանր թեմաներով ձեզ չեմ հոգնեցնի, միայն մի բան կասեմ՝ այսպես է վարվում պատասխանատու իշխանությունը, որը փորձում է մարդկանց զերծ պահել բուլլինգից և վիրավորանքներից, ինչը բազմիցս տեսել ենք նույն երաժիշտների հասցեին», – ասել է Կախա Կալաձեն։

Քաղաքապետը նաև նշել է, որ Նոր տարվա գիշերը հասարակական տրանսպորտի աշխատանքը կերկարաձգվի, և ինչպես մետրոն, այնպես էլ ավտոբուսները բնակչությանը սպասարկելու են անվճար՝ հունվարի 1-ի 00:00-ից մինչև 03:00։ Բացի այդ, երկարացված ռեժիմով կաշխատի նաև Ռիկե-Նարիկալա ճոպանուղին։