Իշխանության ներկայացուցիչները ցավակցություն են հայտնել դերասան Կախի Կավսաձեի ընտանիքին: Վարչապետ Իրակլի Ղարիբաշվիլին, խորհրդարանի խոսնակ Կախա Կուճավան, Թբիլիսիի քաղաքապետ Կախա Կալաձեն, նախարարներն ու պատգամավորները Շոթա Ռուսթավելիի թատրոնում ներկա են գտնվել քաղաքացիական հոգեհանգստին:
Կախի Կավսաձեին կհուղարկավորեն այսօր Սաբուրթալոյի գերեզմանատանը, կնոջ՝ Բելա Միրիանաշվիլիի կողքին:
Կախի Կավսաձեն մահացավ ապրիլի 27-ին՝ 85 տարեկան հասակում: Վերջին մի քանի շաբաթների ընթացքում նա բուժվում էր Առաջին համալսարանական կլինիկայում:
Կախի Կավսաձեն Վրաստանի վաստակավոր արտիստ էր: Նա արժանացել է մի շարք մրցանակների. Եղել է Շոթա Ռուսթավելիի անվան պետական մրցանակի դափնեկիր, Կոտե Մարջանիշվիլիի պետական մրցանակի դափնեկիր, ստացել է Իպոլիտե Խվիչիայի «Իպո» մրցանակ: 2008 թվականին Ռուսթավելի թատրոնի դիմաց բացվեց Կախի Կավսաձեի անվան աստղ:
