«Ազգային շարժում» կուսակցության անդամ Իրակլի Ֆավլենիշվիլին հայտարարում է, որ 540 հազար լարը, որը «Ազգային շարժումը» վճարել է «Ֆորմուլա» հեռուստաընկերությանը, ընտրական պարտք էր։

Ֆավլենիշվիլիի խոսքով՝ երբ պայմանագրեր են կնքվում տարբեր դերակատարների միջև, դա չի նշանակում, թե մեկը ներկայացնում է մյուսի շահերը։

Նրա խոսքով՝ կուսակցությունը «մարել է պարտքը, և կան համապատասխան փաստաթղթեր»։

«Այն, որ «Ազգային շարժում» կուսակցությունն օգտվում է որոշակի ծառայություններից, չպետք է գումար վճարի՞։ Կոնկրետ պայմանագրեր են կնքվել։ Ընտրական ժամանակահատվածում ունեինք տարբեր ծախսերի հետ կապված պարտքեր, և երբ ունեցանք հնարավորություն՝ գրասենյակը վաճառելուց հետո, այդ պարտքերի մեծ մասը, եթե ոչ ամբողջը, մարվել է։ Կարծեմ նաև արխիվային նյութերի հետ կապված ծախս կար։

Երբ պայմանագրեր են կնքվում տարբեր դերակատարների միջև, դա նշանակո՞ւմ է, որ մեկը ներկայացնում է մյուսի շահերը։ Այդպես չէ։ Մենք մարել ենք ընտրական պարտքը, և կան համապատասխան փաստաթղթեր։ Միգուցե հասկանում եք, եթե այս ամենը ապօրինի լիներ, այս գործընթացն ընդամենը նախազգուշացմամբ չէր ավարտվի», – ասել է Ֆավլենիշվիլին։

Հաղորդակցությունների հանձնաժողովի տվյալներով՝ «Ֆորմուլա» հեռուստաընկերությունը «Ազգային շարժում» կուսակցությունից ստացել է 540 հազար լարի։ Հաղորդակցությունների հանձնաժողովը գրավոր նախազգուշացում է ուղարկել «Ֆորմուլա Մուլտիմեդիա»-ին՝ քաղաքական կուսակցությունից ֆինանսավորում ստանալու պատճառով։