Վրաստանի վարչապետ Իրակլի Կոբախիձեն հանդիպել է Պարսից ծոցի համագործակցության խորհրդի (ՊԾԽ) գլխավոր քարտուղար Ջասեմ Մոհամմեդ Ալբուդաևի հետ։

Կառավարության վարչակազմի մամուլի ծառայության հաղորդմամբ՝ վարչապետը շնորհավորել է Ջասեմ Մոհամմեդ Ալբուդաևին գլխավոր քարտուղարի պաշտոնը ստանձնելու կապակցությամբ և մաղթել հաջողություններ։

«Հանդիպման ընթացքում քննարկվել են Վրաստանի և Պարսից ծոցի համագործակցության խորհրդի միջև առկա հարաբերությունները, և նշվել է, որ Խորհրդի հետ ազատ առևտրի համաձայնագրի ստորագրումը կնպաստի այդ կապերի հետագա խորացմանը։

Հայտարարվել է, որ մոտ ապագայում դրական որոշում կկայացվի համապատասխան բանակցությունների մեկնարկի վերաբերյալ։

Հանդիպմանը, որը տեղի է ունեցել Դուբայում՝ Համաշխարհային կառավարությունների գագաթնաժողովի շրջանակներում, մասնակցել են արտաքին գործերի նախարար Մակա Բոչորիշվիլին և կառավարության վարչակազմի ղեկավար Լևան Ժորժոլիանին», – ասվում է պաշտոնական տեղեկատվության մեջ։