«Վստահ եմ, որ այս այցը նոր մակարդակի կբարձրացնի Վրաստան-Տաջիկստան երկկողմ հարաբերությունները. այցի շրջանակներում ստորագրվել է ինչպես համատեղ կոմյունիկե, այնպես էլ մի շարք երկկողմ փաստաթղթեր, որոնք կնպաստեն մեր համագործակցության խորացմանը», – այս մասին Վրաստանի վարչապետ Իրակլի Կոբախիձեն հայտարարել է Տաջիկստանի Հանրապետության նախագահ Էմոմալի Ռահմոնի հետ համատեղ կայացած ճեպազրույցում:
Նրա խոսքով՝ նախագահի հետ հանդիպման ժամանակ քննարկվել են երկկողմ համագործակցության տարբեր հարցեր, այդ թվում՝ Վրաստան-Տաջիկստան համագործակցությունը միջազգային կազմակերպությունների շրջանակներում:
«Ուրախ եմ, որ այսօր պաշտոնական այցով գտնվում եմ Տաջիկստանի Հանրապետությունում: Ցանկանում եմ նշել, որ մեր ժողովուրդներին և երկրներին կապում են պատմականորեն ձևավորված առանձնահատուկ հարաբերություններ, որոնք հիմնված են փոխադարձ հարգանքի վրա: Չնայած դրան, այսօր տեղի ունեցավ Վրաստանից Տաջիկստանի Հանրապետություն ամենաբարձր մակարդակի առաջին այցը։ Հետևաբար, այս այցն իր բովանդակությամբ կարող է գնահատվել որպես պատմական։ Վստահ եմ, որ այս այցը նոր մակարդակի կբարձրացնի Վրաստան-Տաջիկստան երկկողմ հարաբերությունները։ Մենք շատ շահագրգռված ենք մեր հարաբերությունների և բարեկամության էլ ավելի խորացմամբ:
Այցի շրջանակներում ստորագրվել է ինչպես համատեղ կոմյունիկե, այնպես էլ մի շարք երկկողմ փաստաթղթեր, որոնք կնպաստեն մեր համագործակցության խորացմանը։
Ինձ համար մեծ պատիվ էր այսօր հանդիպել նախագահ Ռահմոնին։ Մենք շատ հետաքրքիր զրույց ունեցանք երկկողմ համագործակցության տարբեր հարցերի շուրջ։ Այս տարի Տաջիկստանի Հանրապետությունը նշում է անկախության 35-ամյակը։ Ցանկանում եմ ձեզ փոխանցել իմ անկեղծ շնորհավորանքները և մաղթել ձեզ ու բարեկամ տաջիկ ժողովրդին խաղաղություն, բարօրություն և հետագա հաջողություններ։
Այստեղ կօգտվեմ առիթից և ևս մեկ անգամ երախտագիտություն կհայտնեմ Տաջիկստանի Հանրապետության իշխանություններին՝ մեր միջազգայնորեն ճանաչված սահմաններում Վրաստանի ինքնիշխանությանն ու տարածքային ամբողջականությանն աջակցելու համար։ Մենք այսօր քննարկել ենք համագործակցության տարբեր ասպեկտներ, այդ թվում՝ քննարկել ենք Վրաստան-Տաջիկստան համագործակցությունը միջազգային կազմակերպությունների շրջանակներում և պատրաստակամություն հայտնել ապագայում նույնպես շարունակել ակտիվ համագործակցությունն այս ուղղությամբ», – նշել է վարչապետը։
