Վրաստանի վարչապետ Իրակլի Ղարիբաշվիլին աշխատանքային այցի շրջանակներում Բուխարեստում հանդիպել է Ռումինիայի վարչապետ Նիկոլաե-Իոնել Չուկայի հետ։

Հանդիպմանն ընդգծվել է, որ գործընկեր երկրների ղեկավարների կողմից կանաչ էներգիայի զարգացման և փոխանցման մասին համաձայնագրի ստորագրումը կարևոր իրադարձություն է եվրոպական էներգետիկ անվտանգության առկա մարտահրավերների լույսի ներքո։

Իրակլի Ղարիբաշվիլին ասել է, որ այս նախագիծն էլ ավելի կարևոր է Սևծովյան տարածաշրջանում էներգետիկ անվտանգության և կապի ամրապնդման տեսանկյունից։ Կարևոր է, որ այս գաղափարի սկզբնական նախաձեռնողներն են եղել մեր երկու երկրները՝ ի դեմս Սևծովյան ստորջրյա էլեկտրական մալուխի նախագծի, որը վերածվել է լայնածավալ եվրոպական նախագծի։

Վարչապետի խոսքով՝ Վրաստանը հավատարիմ է մնում այս նախաձեռնության ժամանակին իրականացմանը։
Զրույցի ընթացքում շոշափվել է նաև երկու ռազմավարական գործընկեր երկրների միջև առկա ոլորտային համագործակցության հետագա խորացման կարևորությունը, այդ թվում՝ առևտրատնտեսական, պաշտպանության և անվտանգության, կրթության և մշակույթի ոլորտներում։ Ինչպես հանդիպմանը նշել է Վրաստանի վարչապետը, Ռումինիան վերջին մի քանի տարիների ընթացքում եղել է երկրի առաջատար առևտրային գործընկերներից մեկը, և Վրաստանը պատրաստ է ամբողջությամբ օգտագործել իր առկա ներուժը ինչպես առևտրատնտեսական, այնպես էլ այլ ուղղություններով։

Ընդգծվել է Վրաստանի պաշտպանունակությունն ու դիմակայունության ամրապնդմանն ուղղված զգալի ֆինանսական օգնության մասին վերջերս ընդունված որոշումը, այդպիսով Ռումինիան ևս մեկ անգամ հաստատել է Վրաստանին իր ամուր քաղաքական և գործնական աջակցությունը։

Իրակլի Ղարիբաշվիլին ևս մեկ անգամ շնորհակալություն է հայտնել իր ռումինացի գործընկերոջը՝ Վրաստանի ինքնիշխանությանն ու տարածքային ամբողջականությանը և Վրաստանի եվրոպական և եվրատլանտյան օրակարգի իրականացմանն աջակցելու համար։

Տեղեկությունը տարածում է Վրաստանի վարչապետի մամուլի գրասենյակը։