Կարևոր օր է Ռումինիայում, որտեղ ստորագրվել է կանաչ էներգիայի զարգացման և փոխանցման ռազմավարական համաձայնագիրը, հարկ է նշել, որ Վրաստանն առանձնահատուկ տեղ ունի այս գործընթացում,- հայտարարել է Վրաստանի արտաքին գործերի նախարար Իլիա Դարչիաշվիլին։

Նրա խոսքով, Վրաստանն իսկապես դառնում է առանցքային երկրներից մեկը կանաչ, վերականգնվող էներգիայի արտադրության ուղղությամբ, ինչպես նաև, որպես փոխանցման մաս, Վրաստանն ապագայում կունենա ակտիվ և կարևոր դերակատարում։

«Հարկ է նշել, որ այս նախագիծը մեր երկիրն էլ ավելի է մոտեցնում Եվրամիությանը։ Ուզում եմ ընդգծել, որ Եվրոպական հանձնաժողովի նախագահի ներկայությունն այսօրվա հանդիպմանը առանձնահատուկ նշանակություն ունի։ Սա նշանակում է, որ նախագծին աջակցում է Եվրահանձնաժողովը։ Բացի այն, որ ԵՄ անդամ երկու երկրներ այս համաձայնագրի կողմ են, կարծում եմ, հատկապես կարևոր էր Եվրահանձնաժողովի նախագահի ներկայությունը, այս քաղաքական ժեստը, նրա ժամանումը այստեղ։ Սա նշանակում է, որ այս նախագիծը մի կողմից կաջակցվի, մյուս կողմից Վրաստանին տրված է տարածաշրջանային առաջնորդի դեր խաղալու այլ լծակ, ինչը, իհարկե, օգնում է մեր երկրի եվրաինտեգրմանը։ Սա մեր արտաքին քաղաքականության հիմնական առաջնահերթություններից է»,- ասել է Իլիա Դարչիաշվիլին։

Այսօր Վրաստանը, Ադրբեջանը, Ռումինիան և Հունգարիան ստորագրեցին Սև ծովով էլեկտրաէներգիա փոխանցող ստորջրյա մալուխի նախագիծը։ Ստորագրման արարողությունը տեղի է ունեցել Ռումինիայում՝ Կոտրոչեն պալատում։ Փաստաթուղթը ստորագրել են Վրաստանի վարչապետ Իրակլի Ղարիբաշվիլին, Ադրբեջանի Հանրապետության նախագահ Իլհամ Ալիևը, Ռումինիայի վարչապետ Նիկոլաե Չուկան և Հունգարիայի վարչապետ Վիկտոր Օրբանը։

Արարողությանը ներկա է եղել Եվրահանձնաժողովի նախագահ Ուրսուլա ֆոն դեր Լեյենը։