ԱՄՆ նախագահ Դոնալդ Թրամփը և Չինաստանի նախագահ Սի Ցզինպինը հանդիպեցին Հարավային Կորեայում։ Բանակցությունները տևեցին գրեթե երկու ժամ։

Բանակցություններից առաջ Դոնալդ Թրամփը հայտարարեց, որ ակնկալում է «շատ հաջող հանդիպում» և հավելեց, որ «միշտ լավ հարաբերություններ է ունեցել» Սի Ցզինպինի հետ։

«Մենք շատ հաջող հանդիպում ենք ունենալու։ Այնուամենայնիվ, նա շատ դժվար բանակցող է, ինչը լավ չէ։ Մենք շատ լավ ենք ճանաչում միմյանց։ Մենք շատ լավ ենք հասկանում միմյանց, մենք հիանալի հարաբերություններ ունենք, մենք միշտ հիանալի հարաբերություններ ենք ունեցել», – հանդիպումից առաջ ասաց Դոնալդ Թրամփը։

Իր հերթին Սի Ցզինպինը նշեց, որ մեծ հաճույք է տեսնել Թրամփին։

Չինաստանի նախագահը նշեց, որ վերընտրվելուց ի վեր Դոնալդ Թրամփի հետ երեք անգամ խոսել է հեռախոսով և գրավոր։

«Բնական է, որ աշխարհի երկու առաջատար տնտեսությունները ժամանակ առ ժամանակ հակամարտություններ ունենան։ Ես հրապարակավ բազմիցս ասել եմ, որ Չինաստանը և Միացյալ Նահանգները պետք է լինեն գործընկերներ և ընկերներ։ Սա է, ինչ մեզ սովորեցնում է պատմությունը և ինչ է պահանջում իրականությունը», – ասաց Սի Ցզինպինը, հավելելով, որ երկու երկրներն էլ պետք է «շարունակեն քայլել ճիշտ ճանապարհով»։

Ակնկալվում է, որ առաջնորդները հանդիպման ժամանակ կքննարկեն մի քանի կարևոր հարցեր, այդ թվում՝ առևտրային համաձայնագիրը, սակագները և TikTok-ի վաճառքը։