Հանրային հեռարձակողի և Թբիլիսիի պետական համալսարանի միջև կնքվել է համագործակցության հուշագիր
Համագործակցության հուշագիր է ստորագրվել Հանրային հեռարձակողի և Թբիլիսիի պետական համալսարանի միջև: Հուշագիրը ստորագրվեց այսօր Թբիլիսիի պետական համալսարանում:
Համաձայն հուշագրի, Վրաստանի Առաջին ալիքը ակտիվորեն համագործակցելու է ԹՊՀ սոցիալ-քաղաքական գիտությունների ֆակուլտետի հետ՝ հեռուստառադիոյի որակավորված մասնագետներ պատրաստելու և մասնագիտական կրթությունը խթանելու գործում, ինչը նպատակ ունի բարձրացնել ուսանողների ուսման մոտիվացիան:
«Մենք նախատեսում ենք ակտիվ համագործակցել բարձրագույն ուսումնական հաստատությունների հետ: Այսօր մենք հուշագիր ստորագրեցինք Թբիլիսիի պետական համալսարանի հետ: Մոտ ապագայում մենք ուսանողներին շատ լավ հնարավորություններ կառաջարկենք՝ մասնակցելու լրատվության ոլորտի տարբեր միջազգային դասընթացների: Դա վերաբերում է ինչպես պետական, այնպես էլ մասնավոր համալսարանների ուսանողներին», – ասաց Վրաստանի Առաջին ալիքի գլխավոր տնօրեն Թինաթին Բերձենիշվիլին:
Ըստ ԹՊՀ ռեկտոր Գիորգի Շարվաշիձեի, փորձի վրա հիմնված ուսուցումը արդյունավետ կլինի իրենց ուսանողների համար:
«Առաջին համալսարանի ուսանողները հնարավորություն կունենան բարելավել իրենց որակավորումը Վրաստանի Առաջին ալիքում, մոտենալ իրենց ապագա մասնագիտությանը, մասնակցել սեմինարների, միջազգային դասընթացների», – ասաց Գիորգի Շարվաշիձեն: