«Ինչպե՞ս աշխատեմ մի մարդու հետ, ով իմ հանդեպ անպատասխանատու վարք է դրսևորում, ով մի քանի օր առաջ բաներ էր ասում, իսկ հիմա ասում է՝ եկ միավորվենք», – այս մասին հայտարարել է «Լելո – Ուժեղ Վրաստանի համար» անդամ Գրիգոլ Գեգելիան։

Նրա խոսքով՝ եթե մարդկանց մեջ պատասխանատվություն տեսնի, այդ դեպքում գուցե ինչ-որ բանի մասին մտածի։

«Որոշ քաղաքական ուժեր պետք է վերանայեն իրենց պատասխանատվությունը, երբ մեր մասին են խոսում։ Մենք որևէ տեղ չենք գնացել։ Տեսեք՝ վերջին երեք ամիսների ընթացքում ինչ էին ասում մեր մասին։ Արդյոք խոսքը իրոք անարժե՞ք է։ Շատ լավ եմ հիշում՝ մի շարք քաղաքական ուժեր և նրանց գլխավոր խոսնակները ասում էին, թե մեր քաղաքական ուժը գործարքի մեջ է։ Այդ մասին ներողություն կհայտնե՞ն։ Մենք երբեք ոչ ոքի չենք ասել դավաճան, մինչդեռ երեք ամիս անիմաստ հարձակումներ էին մեր դեմ։ Ո՞ւր պիտի վերադառնամ, թե իբր գնացե՞լ էի։

Միավորման առաջարկ անում է մարդ, ով օրեր առաջ սուտ էր ասում, իբր «Լելոն» ինչ-որ մեկին լռեցնելու համար փող էր առաջարկել։ Դա սուտ էր։ Անուն չեմ ասի։ Մենք բողոքող չենք, ազգային շահն ենք առաջնորդվում։ Բայց երբ միավորում ես առաջարկում, նախ՝ ինչի շուրջ է միավորումը, դա դեռ չենք հասկանում, պետք է իմանանք բովանդակությունը, թե ուր ենք միավորվում։ Ինձ հետաքրքիր է՝ այս երկրում երբևէ չպետք է գա այն պահը, երբ խոսքը արժեք ունենա՞։ Լա՞վ է, որ օրեր առաջ ասում էիր՝ գործարքի մեջ ես, իսկ հիմա ասում ես՝ եկ միավորվենք։ Մեր երկու առաջնորդը բանտում էր, մենք ծանր շաբաթներ ենք ապրել, պայքարում էինք, մարդիկ մեզ ականջին բաներ էին ասում, և հիմա այդ մարդիկ ուզում են մեզ հետ միավորվել։ Ես սպասում եմ պատասխանատվություն։ Եթե մարդկանց մեջ պատասխանատվություն տեսնեմ, գուցե ինչ-որ բանի մասին մտածեմ։ Բայց ինչպե՞ս աշխատեմ մի մարդու հետ, ով իմ հանդեպ անպատասխանատու է եղել», – նշել է Գրիգոլ Գեգելիան։