ԿԸՀ նախագահ Գիորգի Կալանդարիշվիլին հերթական անգամ պարզաբանել է նախագահական ընտրություններում կոլեգիայի անդամների քվեարկության կարգը։

Ինչպես ասել է Կալանդարիշվիլին, կոլեգիայի անդամների քվեարկությունը կշարունակվի մինչև ժամը 14:00-ն, և, հետևաբար, մինչև այդ ժամը նրանք կարող են արձանագրել իրենց դիրքորոշումը։

«Ընտրական կոլեգիայի մասնակիցների թիվը թարմացվել է։ Այսօրվա քվեարկությունը կհեռարձակվի ուղիղ եթերով, և հանրությունը հնարավորություն կունենա հետևել ընթացքին։ Բացի այդ, նշենք, որ առավոտյան ժամը 09:00-ից մինչև ցերեկը 14:00-ն ընտրական կոլեգիայի անդամը հնարավորություն ունի ներկայանալ և մասնակցել ընտրություններին։ Այս փուլում նրանք, ում ազգանունները կարդացել են, եթե նիստերի դահլիճում ներկա չեն, ապա մինչև ժամը 14:00-ն ցանկացած ժամանակ հնարավորություն ունեն ներկայանալ և մասնակցել ընտրություններին»,- ասել է Կալանդարիշվիլին։

Բացի այդ, ըստ Կալանդարիշվիլիի, քվեարկության գործընթացի ավարտից հետո ԿԸՀ-ն կհաշվի արդյունքները, կկազմի ամփոփ հաշվետվություն և այն կներկայացնի հանրությանը։

«Քվեարկության ավարտից հետո ԿԸՀ-ն կհանդիպի եւ նիստ կանցկացնի, որտեղ կհաշվարկվեն արդյունքները եւ կկազմվի համապատասխան ամփոփ արձանագրություն։ Այնուհետև մենք նորից կհավաքվենք նիստերի դահլիճում և հանրությանը կտեղեկացնենք արդյունքների մասին»,- ասել է Կալանդարիշվիլին։

Ընտրական կոլեգիան այսօր կընտրի Վրաստանի վեցերորդ նախագահին։

Նախագահական ընտրություններին զուգահեռ Վրաստանի խորհրդարանի մոտ բողոքի ակցիա է ընթանում։ Օրենսդիր մարմնի մոտ հավաքվածներն ասում են, որ օրենսդիր մարմնում նախագահի ընտրության ընթացակարգը ոչ լեգիտիմ է, քանի որ խորհրդարանն ինքը նույնպես լեգիտիմ չէ։