Լատվիայի Բաուսկա քաղաքում վրացական անկյուն է բացվել
Լատվիայում վրացական երիտասարդական կազմակերպությունների ներկայացուցիչների պատվիրակության այցի շրջանակներում, Բաուսկա քաղաքում՝ տեղական «Երիտասարդների ժամանակն է» (Laiks Jauniešiem) երիտասարդական կազմակերպության գրասենյակում, հանդիսավորությամբ բացվել է վրացական անկյուն:
Այս նախաձեռնությունը վրացական և լատվիական երիտասարդական կազմակերպությունների միջև առկա սերտ համագործակցության գործնական արդյունքն է, որի նպատակն է երկու երկրների երիտասարդների միջև քաղաքացիական երկխոսության խորացումն ու ժողովրդական դիվանագիտության դերի ուժեղացումը:
Նորաբաց վրացական անկյունում տեղադրվել է Վրաստանի պատմության, մշակույթի և արվեստի մասին հատուկ ընտրված գրականություն, ինչպես նաև վրացական մշակույթին բնորոշ այլ տարրեր, որոնք տեղի երիտասարդներին և հյուրերին կծանոթացնեն Վրաստանի հարուստ ժառանգության հետ:
Տարածքը պարբերաբար կհյուրընկալի Վրաստանի մասին կրթական և մշակութային միջոցառումներ: Դրանից զատ, երկկողմ համագործակցության շրջանակներում նախատեսվում է ամեն տարի վրացի կամավորների ուղարկում Լատվիա, ովքեր անմիջականորեն կներգրավվեն լատվիական երիտասարդական կազմակերպությունների գործունեության մեջ և իրենց ավանդը կներդնեն վրացի և լատվիացի երիտասարդների միջև գործընկերային հարաբերությունների հետագա ամրապնդման գործում:
Վրացի երիտասարդները համարում են, որ այնպիսի կենտրոնների առկայությունը, ինչպիսին Բաուսկայում բացված վրացական անկյունն է, էապես կնպաստի ժողովուրդների մերձեցմանը և Վրաստանի եվրոպական ինտեգրման գործընթացին:
Այցն իրականացվել է Լատվիայի Հանրապետության արտաքին գործերի նախարարության աջակցությամբ: