«Գերմանիայի համար այլընտրանք» կուսակցության անդամ Լարս Գյունտերը Ֆրանկֆուրտի դատախազությունում բողոք է ներկայացրել Բադ Ֆրայենվալդեի տեղական ինքնակառավարման ընտրությունների երկրորդ փուլում արձանագրված խախտումների վերաբերյալ։

Լարս Գյունտերը, որը Բադ Ֆրայենվալդեում «Գերմանիայի համար այլընտրանք» կուսակցության տարածաշրջանային նախագահն է, խոսում է ընտրությունների կեղծման և միջամտության մասին և դատախազությունից պահանջում է արխիվացնել երկրորդ փուլի ընտրական փաստաթղթերը։

Հոկտեմբերի 19-ին տեղի ունեցած ընտրությունների երկրորդ փուլում անկախ թեկնածու Ֆրենկ Վետելը, որին աջակցում էր «Գերմանիայի համար այլընտրանք» կուսակցությունը, պարտվեց «Քրիստոնեադեմոկրատական միության» թեկնածու Ուլրիկ Հայդեմանին՝ ստանալով ձայների 48.4 տոկոսը, մինչդեռ Հայդեմանը հավաքեց 51.6 տոկոս։

Հայդեմանը Վետելին հաղթեց 160 ձայնի տարբերությամբ, սակայն «Գերմանիայի համար այլընտրանք» կուսակցությունում հայտարարում են, որ 401 գրանցված ընտրող, ովքեր նախապես դիմել էին փոստով քվեարկության համար, տեխնիկական սխալի պատճառով երկու անգամ ստացել են քվեաթերթիկ։

Բադ Ֆրայենվալդեի դեռևս գործող քաղաքապետ Ռալֆ Լեմանը հաստատում է, որ քվեաթերթիկների տպման ժամանակ իսկապես առաջացել է սխալ, ինչի հետևանքով մոտ 400 ընտրողի կրկին ուղարկվել է տեխնիկապես ուղղված նոր քվեաթերթիկ, իսկ սխալները չեղարկվել են։ Ռալֆ Լեմանը բացառում է կրկնակի հաշվարկի հնարավորությունը, քանի որ կատարվել է քվեաթերթիկների մարկավորում և ընտրողների տեղեկացում։