Ֆրանսիայի ներքին գործերի նախարարը հայտարարում է, որ նոյեմբերի 5-ին տեղի ունենալիք բողոքի ակցիաների ընթացքում ոստիկանությունը լիազորված կլինի անհապաղ միջամտել, եթե հարձակումներ տեղի ունենան անհատների, ինչպես նաև մասնավոր կամ պետական սեփականության վրա
Ֆրանսիայի ներքին գործերի նախարար Լորան Նունյեսը իրավապահ մարմիններին կոչ է արել խստացնել անվտանգության միջոցառումները՝ նոյեմբերի 5-ին նախատեսված համազգային գործադուլի և լայնածավալ բողոքի ակցիաների նախաշեմին։
Նախարարը հայտարարել է, որ ոստիկանությունը և ժանդարմերիան պետք է կանխեն հասարակական կարգի խախտումները և անհապաղ գործողություններ ձեռնարկեն բռնի միջադեպերի դեպքում։ Ըստ Նունյեսի՝ իրավապահները կկիրառեն «հզոր, օպերատիվ և ճկուն» համակարգ, որը ներառում է նաև անօդաչու թռչող սարքերի օգտագործումը։
Ներքին գործերի նախարարի հրահանգի համաձայն՝ ոստիկանությունը լիազորված է անհապաղ միջամտել անհատների, ինչպես նաև մասնավոր կամ պետական գույքի վրա հարձակումների դեպքում։
Անվտանգությունն ապահովելու նպատակով իշխանությունները մի շարք սահմանափակումներ են մտցնում։ Պաշտոնական հրամանագրերով արգելվում է զենք և պաշտպանիչ պարագաներ կրելը, ինչպես նաև պիրոտեխնիկայի վաճառքն ու տեղափոխումը։ Կուժեղացվի նաև անվտանգության հսկողությունը ճանապարհներին և երկաթուղային կայարաններում։ Լորան Նունյեսը տարածաշրջանային պրեֆեկտներին հանձնարարել է բողոքի ակցիաների երթուղիներն այնպես պլանավորել, որ ցուցարարները չանցնեն քաղաքների կենտրոնական թաղամասերով։
Ֆրանսիական լրատվամիջոցների տվյալներով՝ տարածքային հետախուզական ծառայությունը նոյեմբերի 5-ը դասակարգել է որպես բարձր ռիսկայնության օր։ BFMTV հեռուստաալիքի հաղորդման մեջ, հղում անելով նոյեմբերի 3-ով թվագրված հետախուզական փաստաթղթին, նշվում է բռնության սրման վտանգի մասին՝ հատկապես քաղաքների կենտրոններում։
Հետախուզական գնահատականների համաձայն՝ ակնկալվում է, որ տարբեր տարածաշրջաններում բողոքի ակցիաներին կմասնակցի 500 000-ից մինչև 700 000 մարդ։