«Էնկա»-ի հետ պայմանագրում շատ բան անընդունելի էր, մեր ինքնիշխան իրավունքն է, որ ներդրողի հետ խոսենք այն պայմանների բարելավման մասին, որոնք անհանգստացնում են բնակչությանը, այդ թվում նաև ինձ. Իրակլի Ղարիբաշվիլի
Վրաստանի վարչապետ Իրակլի Ղարիբաշվիլիի հայտարարությամբ, «Էնկա» ընկերության հետ կնքված պայմանագրում շատ բան անընդունելի էր, որոնց մասին նա զրուցել է նաև ներդրողի հետ:
Ղարիբաշվիլիի խոսքով, Վրաստանի կառավարությունն ինքնիշխան իրավունք ունի խոսելու ներդրողի հետ այն պայմանների բարելավման մասին, որոնք անհանգստացնում էին բնակչությանը:
Կառավարության ղեկավարը միևնույն ժամանակ պարզաբանում է, որ կառավարությունը կշարունակի երկխոսությունն ու կապը ներդրող ընկերության հետ:
«Նախ, այո, ես կարող եմ հաստատել, որ ես ժառանգել եմ այս պայմանագիրը, ինչպես նաև շատ այլ բաներ: Բնականաբար, շատ բան անընդունելի էր այս պայմանագրում, ես դրա մասին բացեիբաց խոսեցի ներդրողի հետ: Մեր բացարձակ ինքնիշխան իրավունքն է խոսել ներդրողի հետ այն պայմանների բարելավման մասին, որոնք անհանգստացնում են մեր ժողովրդին, այդ թվում ՝ ինձ, որպես մեր երկրի սովորական քաղաքացու, և դա միանգամայն նորմալ է: Երկրորդ, ինչ վերաբերում է ընդհանուր գործընթացին, մենք կշարունակենք երկխոսությունն ու կապը ներդրող ընկերության հետ: Մենք բացարձակապես ստեղծել ենք բոլոր պայմանները, որպեսզի նրանք շարունակեն աշխատել նորմալ պայմաններում, չնայած տեղում տեղի ունեցող բողոքի ցույցերին, բայց, իհարկե, մենք կունենանք հաղորդակցություն, երկխոսություն և դա կպարզենք հաջորդ ամսվա ընթացքում», – ասել է Իրակլի Ղարիբաշվիլին:
Իրակլի Ղարիբաշվիլին հայտարարում է, որ այս թեմայով ինքը ոչ մի շփում չի ունեցել Թուրքիայի նախագահ Էրդողանի հետ:
«Ինչ վերաբերում է այն հարցին, թե արդյոք ես որևէ հաղորդակցություն եմ ունեցել նախագահ Էրդողանի հետ, մենք դրա վերաբերյալ որևէ զրույց չենք ունեցել և սա զուտ ներդրողի և պետության միջև հարաբերություններ են: Մենք հոգ ենք տանում բոլոր ներդրողների մասին, մյուս կողմից, մենք առավելագույն հարմարավետություն կստեղծենք բոլոր ներդրողների համար բնականաբար` հաշվի առնելով մեր պետության և մեր քաղաքացիների շահերը: Նաև կցանկանայի ասել, որ առաջիկա տարիներին մեր ռազմավարությունը կլինի ավելի շատ էներգետիկ անկախություն ձեռք բերել, ավելի շատ ներդրումներ էներգետիկ ոլորտում և մենք չենք ակնկալում որևէ խնդիր կամ խոչընդոտ այս ուղղությամբ»,- հայտարարել է Իրակլի Ղարիբաշվիլին:
Ինչ վերաբերում է լրագրողի հարցին, թե ինչքա՞ն պետք է վճարի Վրաստանը, ըստ Ղարիբաշվիլիի, դա շատ հեռավոր հեռանկար է, բանակցություններ կընթանան ըստ ընկերության կատարած ներդրումների ծավալի գնահատման, կան բազմաթիվ վարկածներ և նա խնդիր չի տեսնում այս ուղղությամբ:
«Սա շատ հեռու հեռանկար է, ոչ ոք չգիտի, թե մենք որքան գումար պետք է վճարենք: Եթե ընկերությունը հեռանա, իհարկե, կհաշվվի, սա կանցնի աուդիտ անկախ աուդիտորական ընկերության կողմից, որը կգնահատի ընկերության ծախսած ներդրումների չափը: Համապատասխանաբար կանցկացվեն բանակցություններ: Կան բազմաթիվ տարբերակներ: Այնպես որ, ես խնդիր չեմ տեսնում այս ուղղությամբ», – հավելել է Իրակլի Ղարիբաշվիլին:
