Ուզում եմ հավատալ, որ կա ճանապարհ՝ երկրի եվրոպական նկրտումներին համապատասխան, բաց, քաղաքավարի երկխոսության ճանապարհ բոլոր քաղաքական ուժերի և քաղաքացիական հասարակության կազմակերպությունների հետ։ Այս երկխոսությունը բոլոր վրացիների պատասխանատվությունն է,- ասել է Ֆրանսիայի Հանրապետության նախագահ Էմանուել Մակրոնը՝ վրաց ժողովրդին ուղղված տեսաուղերձում։

Մակրոնի խոսքով՝ Վրաստանի Սահմանադրության մեջ գրված վրաց ժողովրդի եվրոպական նկրտումները չեն կարող դավաճանվել, և Վրաստանի եվրոպական երազանքը չպետք է մարվի։

«Հարգելի վրացի բարեկամներ, Վրաստանին թեկնածուի կարգավիճակ շնորհելու առաջին տարեդարձի նախաշեմին ես կարեւոր համարեցի այս կարճ տեսանյութի միջոցով փոխանցել այս ուղերձը։ Նախ ուզում եմ ձեզ ասել, որ Վրաստանի Սահմանադրության մեջ գրված վրաց ժողովրդի եվրոպական նկրտումները չեն կարող դավաճանվել։ Վրաստանի եվրոպական երազանքը չպետք է մարի: Եվրոպական ուղու այս ընտրությունը ձեր ինքնիշխան որոշումն է, եվրոպական ընտանիքին միանալու այս ընտրությունն այն է, ինչ այսօր խաղաղ կերպով արտահայտվում է Թբիլիսիում և երկրի մի քանի տասնյակ քաղաքներում։ Վրաստանին թեկնածուի կարգավիճակ շնորհելով՝ Եվրոպական խորհուրդը դրական պատասխան տվեց այդ ձգտմանը։ Այս ընտրությունը ենթադրում է որոշակի պարտականությունների և պարտավորությունների կատարում ժամանակի ընթացքում։ Ճանապարհը սահմանված է, Վրաստանն այժմ կարող է ձեռք ձեռքի տված աշխատել Եվրամիության 27 անդամ երկրների հետ՝ վստահորեն կառուցելու այս եվրոպական ապագան, կամ սպասել ու հետաձգել, բայց ինչի՞ սպասել և ինչո՞ւ: Ես վերադառնում եմ, թե ինչի մասին է այս եվրոպական ընտրությունը: ԵՄ-ն չի պարտավորեցնում: Եվրոպան առաջարկում է, ճանապարհ հարթելով հավասար գործընկերության, բարգավաճման և ընդհանուր արժեքների համար: Եվրոպան չի վախեցնում, սպառնալիքներ չի օգտագործում: Եվրոպան չի ձգտում քաոս սերմանել, Եվրոպան չի ձգտում ապակայունացնել կամ հպատակեցնել իր հարեւաններին պատերազմի կամ հիբրիդային միջոցներով։ Նա չի փորձում պառակտում կամ շփոթություն սերմանել իր քաղաքացիների մեջ»,- ասել է Մակրոնը։

Նրա խոսքով, Եվրամիությունը խաղաղության նախագիծ է, որը Եվրոպայի կառուցման հիմքն է իր հիմնադրման օրվանից։

«Եվրամիությունը հարգում է ժողովրդի ինքնիշխան կամքը, ազգերի պատմությունն ու ինքնությունը, ինչպիսին է վրաց ժողովրդի հազարամյա պատմությունը։ ԵՄ-ն չի թելադրում, թե որն է ազգային շահը: Այն հարգում է, մասնավորապես, Վրաստանի տարածքային ամբողջականությունը։ ԵՄ-ն չի աջակցում ձեր երկրում անջատողականներին: Եվրամիությունը խաղաղության նախագիծ է, որը եղել է Եվրոպայի կառուցման հիմքը նրա սկզբից: Եվրամիությունը ագրեսիվ պատերազմ չի սկսել նաև ինքնիշխան պետության դեմ։ Այո՛, Եվրոպան համերաշխություն է, խաղաղության ընտրություն, ընդհանուր ռազմավարական շահերի հավաքական պաշտպանություն մեկ ընտանիքի համար։ Եվրոպան շանտաժ չէ, այն կանոններն ընդունելն է որպես տարաձայնությունները լուծելու միջոց: Վրաստանը պետք է որոշի իր ճակատագիրը: Դրա համար վրացիների ձայնը պետք է լսելի լինի ու հարգվի։

Ուզում եմ ևս մեկ անգամ ձեզ ասել, որ մենք ձեր կողքին ենք՝ աջակցելով ձեր եվրոպական և ժողովրդավարական նկրտումներին։ Վրաստանը չի կարող հույս ունենալ, որ կշարժվի եվրոպական ճանապարհով, եթե խաղաղ ցույցերը ճնշվեն ուժի անհամաչափ կիրառմամբ, եթե ոտնձգության ենթարկվեն քաղաքացիական հասարակության կազմակերպությունները, լրագրողները, ընդդիմադիր կուսակցությունների անդամները, եթե չպաշտպանվեն խոսքի և հավաքների ազատությունը։ Ուզում եմ հավատալ, որ կա ճանապարհ՝ երկրի եվրոպական նկրտումներին համապատասխան, բաց, քաղաքավարի երկխոսության ճանապարհ բոլոր քաղաքական ուժերի և քաղաքացիական հասարակության կազմակերպությունների հետ։ Այս երկխոսությունը բոլոր վրացիների պատասխանատվությունն է։ Նա պետք է հնարավորություն տա վրացիներին իրենց ճակատագիրը նորից իրենց ձեռքը վերցնելու։ Այս ճանապարհը ձերն է: Այդ իսկ պատճառով ես մեծ վստահություն ունեմ վրաց ժողովրդի նկատմամբ և մեծ վստահություն ունեմ բոլորի նկատմամբ, ովքեր գնահատում են այս պատկառելի եվրոպական ուղին և չեն ցանկանում տրվել ահաբեկմանը, քարոզչությանը, կիբերհարձակումներին, տեղեկատվական մանիպուլյացիաներին։

Կեցցե Վրաստանի և Ֆրանսիայի բարեկամությունը և կեցցե Եվրոպան»,- իր տեսաուղերձում ասել է Էմանուել Մակրոնը։