Բռնազավթված տարածքներից փախստականների, աշխատանքի, առողջապահության և սոցիալական պաշտպանության նախարար Էկատերինե Տիկարաձեն հանդիպում է Իմերեթիի շրջանի բժշկական ոլորտի ներկայացուցիչների հետ։

Գերատեսչության տեղեկությամբ, հանդիպման հիմնական թեման երկրում համավարակաբանական իրավիճակն է, պատվաստումների գործընթացում առկա կարիքները, մարտահրավերները և դրանց լուծման ուղիները։

«Նախարարը գործընկերների հետ քննարկում է պատվաստումների ծրագրի ակտիվացման հարցը։ Հանդիպմանը մասնակցում են Իմերեթիի տարածաշրջանում պետական ​​լիազոր Զվիադ Շալամբերիձեն և հայտնի բժիշկներ, այդ թվում՝ Լևան Ռատիանին, Դավիթ Գագուան, Իվանե Չխաիձեն, Մարինա Էզուգբայան և այլն։ Բացի այդ, նախարարը բժշկական հանրությանը ներկայացնելու է առողջապահական համակարգի զարգացման հետագա անելիքները։

Հիշեցնենք, որ «Կովիդ 19»-ի դեմ պատվաստումը վարակից պաշտպանվելու արդյունավետ և անվտանգ միջոց է։ Առողջապահության համաշխարհային կազմակերպությունը, հանրային առողջապահական գործակալությունները և որակավորված բժիշկները խորհուրդ են տալիս պատվաստել «Կովիդ 19»-ի դեմ»,- ասվում է հաղորդագրությունում։