ԱՄՆ նախագահը և Հնդկաստանի վարչապետը հեռախոսազրույց են ունեցել։ Դոնալդ Թրամփը այս մասին գրել է truth social-ում։ Նա ասել է, որ իր համար պատիվ է այսօր առավոտյան հեռախոսազրույց ունենալ Նարենդրա Մոդիի հետ, ով իր ամենամտերիմ ընկերն է և նաև ուժեղ և հարգված առաջնորդ։

Թրամփը նշում է, որ նրանք համաձայնության են եկել առևտրային համաձայնագրի շուրջ, որի համաձայն ԱՄՆ-ն Հնդկաստանի նկատմամբ մաքսատուրքերը 25%-ից կնվազեցնի մինչև 18%։

«Մենք խոսեցինք շատ բաների մասին, այդ թվում՝ առևտրի և Ռուսաստանի ու Ուկրաինայի միջև պատերազմի դադարեցման մասին։ Նա համաձայնեց դադարեցնել ռուսական նավթ գնելը և շատ ավելին գնել Միացյալ Նահանգներից, հնարավոր է՝ նաև Վենեսուելայից։ Սա կօգնի մեզ ավարտել պատերազմը Ուկրաինայում, որտեղ ամեն շաբաթ հազարավոր մարդիկ են մահանում։ Վարչապետ Մոդիի նկատմամբ բարեկամության և հարգանքի նշանով և նրա խնդրանքին համապատասխան, որն ուժի մեջ է մտնում անմիջապես, մենք համաձայնության ենք եկել Միացյալ Նահանգների և Հնդկաստանի միջև առևտրային համաձայնագրի շուրջ, որի համաձայն Միացյալ Նահանգները կսահմանի երկկողմանի մաքսատուրքի նվազեցում՝ այն 25%-ից նվազեցնելով մինչև 18%։ Նրանք, իրենց հերթին, քայլեր կձեռնարկեն Միացյալ Նահանգների դեմ գործող մաքսատուրքերը և ոչ մաքսատուրքային արգելքները զրոյի հասցնելու համար», – ասել է Թրամփը։

ԱՄՆ առաջնորդը նաև ասել է, որ Հնդկաստանի վարչապետը ավելի քան 500 միլիարդ դոլար է հատկացրել ամերիկյան էներգետիկայի, տեխնոլոգիաների, գյուղատնտեսության, ածուխի և շատ այլ ապրանքների գնման համար։

1. «Մեր զարմանալի հարաբերությունները Հնդկաստանի հետ ապագայում էլ ավելի կամրապնդվեն։ Վարչապետ Մոդին և ես երկու մարդ ենք, ովքեր կատարում են այնպիսի աշխատանք, որը մարդկանց մեծ մասը չի կարող անել», – գրել է Թրամփը։