«Մենք պատրաստ ենք գործընկերային հարաբերությունների, բայց ոչ այն բանի համար, որ որևէ մեկը Վրաստանի վրա անարդար ճնշում գործադրի», – այս մասին հայտարարել է «Ժողովրդի ուժ» կուսակցության նախագահ Դիմիտրի Խունդաձեն։

Նրա խոսքով՝ «Եվրոնեստ» վեհաժողովը օգտագործվել է Վրաստանի վրա ճնշում գործադրելու համար։

«Եվրոնեստի վեհաժողովը, որը տեղի ունեցավ Հայաստանում և որին Վրաստանի և Ադրբեջանի պատվիրակությունները չեն մասնակցել, կրկին օգտագործվել է գործընկեր երկրներին, մասնավորապես Վրաստանին, ճնշելու նպատակով։ Նրանց կողմից ընդունված բանաձևը հեռու է իրականությունից, լի է սուտով և խրախուսիչ է ռադիկալ ընդդիմության համար։ Իհարկե, նման վերաբերմունքը անընդունելի է։ Ահա թե ինչու Վրաստանի պատվիրակության մասնակցությունը նման վեհաժողովին կորցնում է իմաստը։ Սա Վրաստանին ենթարկեցնելու պլանի մի մասն է և հերթական հարձակումն է մեր երկրի վրա։ Սակայն մենք կպաշտպանենք մեր երկրի և հասարակության շահերը։ Կրկին հայտարարում ենք՝ պատրաստ ենք գործընկերային հարաբերությունների, բայց ոչ այն բանի համար, որ որևէ մեկը Վրաստանի վրա անարդար ճնշում գործադրի, ընտրությունները հռչակի կեղծված, երբ չկա որևէ փաստ դա հաստատելու համար։ Սա գործընկերային չէ, սա թշնամական վերաբերմունք է, և նման հարաբերությունները շարունակելու իմաստ պարզապես չկա», – հայտարարել է Խունդաձեն։

Նշենք, որ «Եվրոնեստի» խորհրդարանական վեհաժողովը հրապարակել է բանաձև, որը վերաբերում է նաև Վրաստանին։ Բանաձևում նշված է, որ վերջին զարգացումներն արտացոլում են ժողովրդավարության նահանջը։