Բելառուսի պաշտպանության նախարարությունը հայտարարել է երկրի զինված ուժերի մարտական պատրաստվածության լայնածավալ ստուգման մեկնարկի մասին։

Նախարարության հայտարարության համաձայն՝ այս որոշումը կայացվել է երկրի գերագույն գլխավոր հրամանատար Ալեքսանդր Լուկաշենկոյի ցուցումով։

«Իրականացվում են մի շարք միջոցառումներ՝ ստորաբաժանումները բարձրագույն մակարդակի մարտական պատրաստվածության բերելու, որոշակի շրջաններ տեղափոխելու և հրամանների համաձայն առաջադրանքների կատարման նպատակով», – նշված է հայտարարության մեջ։

Ստուգման ընթացքի վերահսկողությունն իրականացվում է Բելառուսի Անվտանգության խորհրդի քարտուղարության կողմից։ Նմանատիպ զորավարժություններ նախկինում անցկացվել են, երբ Ռուսաստանում նկատվել է ռազմական ակտիվության աճ կամ ռուսական զորքերի հետ համատեղ զորավարժությունների ժամանակ։