Ավստրիան իր երկիր չի ընդունի այն մարդկանց, որոնց կմերժեն ապաստան տրամադրել Գերմանիայում
Ավստրիան իր երկիր չի ընդունի այն մարդկանց, որոնց կմերժեն ապաստան տրամադրել Գերմանիայում,- հայտարարել է Ավստրիայի ներքին գործերի նախարար Գերհարդ Կարները։
Այս մասին Կարները հայտարարել է այն բանից հետո, երբ հայտնի է դարձել, որ Գերմանիան ժամանակավորապես կվերականգնի անձնագրային հսկողությունը ցամաքային սահմաններում։
«Մենք մանևրելու հնարավորություն չունենք։ Սա օրենք է»,- ասել է Կարները՝ նշելով, որ արդեն հրապարակել է համապատասխան հրամանագիրը։
Ավստրիայի ներքին գործերի նախարարը բացատրել է, որ, համաձայն եվրոպական օրենսդրության, ապաստան հայցողներին չպետք է հետ վերադարձնեն սահմանից: Դա կարող է տեղի ունենալ միայն ԵՄ համապատասխան անդամ երկրի համաձայնությամբ։
Տեղեկատվության համար՝ Գերմանիան ժամանակավորապես կվերականգնի անձնագրային հսկողությունը ցամաքային սահմաններին։ Գերմանիայի ներքին գործերի նախարար Նենսի Ֆայզերի խոսքով՝ սահմանային հսկողությունը կսկսվի սեպտեմբերի 16-ից և սկզբում կտևի վեց ամիս։ Այս որոշման նպատակն է զբաղվել անօրինական միգրացիայի, ինչպես նաև իսլամիստ ահաբեկչական խմբավորումների և միջազգային հանցավոր կազմակերպությունների սպառնալիքների դեմ։