Ավարտվել է Վրաստանի պաշտպանության նախարարության կիբերանվտանգության բյուրոյի և բրիտանական բանակի համատեղ կիբեր վարժանքը՝ Defense Cyber Marvel 2024:
Եզրափակիչ միջոցառմանը դասընթացի մասնակիցներին դիմեցին Վրաստանի պաշտպանության փոխնախարար Դավիթ Սուջաշվիլին և Վրաստանում Մեծ Բրիտանիայի արտակարգ և լիազոր դեսպան Մարկ Քլեյթոնը։ Նրանք ընդգծեցին կիբերանվտանգության միջազգային փորձի փոխանակման և կիբերպաշտպանության կարողությունների զարգացման կարևորությունը։
Վրաստանի պաշտպանության նախարարության տեղեկատվության համաձայն՝ դասընթացը կենտրոնացած է եղել կիբեր մասնագետների կիբերպաշտպանության հմտությունների զարգացման և կիբերանվտանգության առումով առկա փորձի փոխանակման վրա։ Ուսումնական ծրագրի մոդելավորման սցենարը նախատեսում էր կիբերհարձակումներ կարևոր ենթակառուցվածքների և տեղեկատվական համակարգերի վրա։
Դասընթացին մասնակցել են վրացի և բրիտանացի կիբեր մասնագետներ։ Մեկշաբաթյա դասընթացն անցկացվել է Պաշտպանության ինստիտուցիոնալ շինարարության դպրոցում (DIBS):
Պաշտպանության նախարարության կիբեր մասնագետները երկրորդ անգամ են մասնակցում Վրաստանի և Մեծ Բրիտանիայի միջև պաշտպանական համագործակցության շրջանակներում անցկացվող զորավարժություններին։ Զորավարժությունն ուղղված է կիբերպաշտպանության կարողությունների զարգացմանը և պաշտպանության ոլորտում կայուն կիբերանվտանգության համակարգի, ինչպես նաև ՆԱՏՕ-ի և ԵՄ ստանդարտների հետ համատեղելիությանը։