Եվրոպական խորհրդի նախագահ Անտոնիո Կոստան անընդունելի է համարում Միացյալ Նահանգների կողմից եվրոպական քաղաքականությանը միջամտելու ցանկացած փորձ։

Ըստ Կոստայի՝ Եվրամիությունը «չի կարող հանդուրժել եվրոպական քաղաքականությանը միջամտելու սպառնալիքը»։

Ինչպես բացատրում է եվրոպացի բարձրաստիճան պաշտոնյան՝ «Միացյալ Նահանգները չի կարող փոխարինել եվրոպացի քաղաքացիների ընտրությունը՝ թե որ կուսակցությունն է իրենց համար լավը կամ վատը»։

Կոստան նաև նշում է, որ Միացյալ Նահանգները չի կարող փոխել Եվրոպայի խոսքի ազատության տեսլականը։

Ըստ Անտոնիո Կոստայի՝ մտահոգիչ նշան է, որ Ռուսաստանը ողջունում է Վաշինգտոնի նոր տեսլականը՝ որպես «մեծ մասամբ» համապատասխան իր սեփական տեսլականին։

Հիշեցնենք, որ Դոնալդ Թրամփի վարչակազմը հրապարակել է ԱՄՆ Ազգային անվտանգության ռազմավարություն 2025-ը, որի մեծ մասը նվիրված է եվրոպական հարցերին։ «Մենք ցանկանում ենք, որ Եվրոպան հեռանա սահմանափակող կարգավորումների վրա իր ձախողված կենտրոնացումից, և մեր նպատակը պետք է լինի օգնել Եվրոպային վերադառնալ ճիշտ ուղու վրա», – ասվում է փաստաթղթում։

Փաստաթղթում նաև նշվում է, որ «եթե Եվրոպայում ներկայիս միտումները շարունակվեն, մայրցամաքը անճանաչելիորեն կփոխվի 20 կամ ավելի քիչ տարի հետո»։

ԱՄՆ Ազգային անվտանգության ռազմավարության փաստաթղթում նաև նշվում է. «Եվրոպացիների մեծամասնությունը խաղաղություն է ցանկանում, սակայն դա չի արտացոլվում քաղաքականության մեջ, հիմնականում այն ​​պատճառով, որ նրանց կառավարությունները խաթարել են ժողովրդավարական գործընթացները»։