ԱՄՆ-ն լքել է Եվրոպայի խորհրդի Կոռուպցիայի դեմ պայքարող պետությունների խումբը

ԱՄՆ նախագահ Դոնալդ Թրամփի վարչակազմի որոշմամբ՝ Ամերիկայի Միացյալ Նահանգները լքել է Եվրոպայի հակակոռուպցիոն վերահսկողության բարձրագույն մարմինը, – այս մասին գրում է «Associated Press»-ը։

Ինչպես գրում է «Associated Press»-ը, սա տեղի է ունենում այն ֆոնին, երբ ԱՄՆ-ն շարունակում է միջազգային և բազմակողմ կազմակերպություններից դուրս գալու ծրագիրը և դրանց մեղադրում սեփական լիազորությունների գերազանցման, անարդյունավետության կամ ԱՄՆ քաղաքականության հետ անհամապատասխանության մեջ։

ԶԼՄ-ների փոխանցմամբ՝ Եվրոպայի խորհուրդը երեքշաբթի հայտարարել է, որ Միացյալ Նահանգները մեկ օր առաջ պաշտոնապես ծանուցել է իրեն Կոռուպցիայի դեմ պայքարող պետությունների խմբից (GRECO) դուրս գալու մասին։ GRECO-ն մինչ այդ լքել էր ընդամենը երկու երկիր՝ Ռուսաստանը և Բելառուսը։

ԱՄՆ պետդեպարտամենտը հաստատել է այս տեղեկությունը և հայտարարել, որ ԱՄՆ-ի մասնակցությունը GRECO-ին, որն ամենամյա ֆինանսական մուծումներ է պահանջում, «ԱՄՆ ազգային անվտանգության համար շոշափելի օգուտ չի տալիս»։

«Միջազգային բյուրոկրատական կառույցներին դատարկ չեկեր տրամադրելու դարաշրջանն ավարտվեց։ Փոխարենը, դեպարտամենտը առաջնահերթություն է տալիս կոռուպցիայի դեմ պայքարի ավելի արդյունավետ գործիքների, ինչպիսիք են վիզային սահմանափակումները, պատժամիջոցները և թիրախային արտաքին օգնությունը, որպեսզի ուժեղացվեն օտարերկրյա հետաքննությունները այն կոռուպցիայի դեմ, որը ուղղակի սպառնալիք է ներկայացնում ԱՄՆ անվտանգությանն ու բարօրությանը», – նշված է դեպարտամենտի հայտարարության մեջ։

Ստրասբուրգում գտնվող Եվրոպայի խորհուրդը հայտարարել է, որ ԱՄՆ-ն «արժեքավոր ավանդատու» էր GRECO-ի գործունեության մեջ և «կոռուպցիայի կանխարգելման ու դրա դեմ պայքարի ուղղությամբ փորձի և լավագույն պրակտիկայի փոխանակման գործում»։

«GRECO-ն կրկին պատրաստ է ապագայում վերսկսել համագործակցությունը Միացյալ Նահանգների հետ՝ աջակցելու ընդհանուր ջանքերին կոռուպցիայի կանխարգելման, բարեվարքության ամրապնդման և օրենքի գերակայության պաշտպանության ուղղությամբ», – նշված է Եվրոպայի խորհրդի հայտարարության մեջ։

Այս որոշումը հայտարարվել է մեկ շաբաթ անց այն բանից հետո, երբ ԵԱՀԿ-ն հայտարարեց, որ ԱՄՆ-ն հրաժարվել է հրավիրել իր անդամ երկրների ներկայացուցիչներին որպես դիտորդներ նոյեմբերին նախատեսված Կոնգրեսի միջանկյալ ընտրություններին։