ԱՄՆ-ի Ազգային պաշտպանության ակտում, որը հաստատվել է Սենատի կողմից, «Ընկերության ակտի» մասին որևէ հիշատակում չկա։

Վրաստանի հետ առնչվող «Ընկերության ակտի» նախագիծը պատրաստել էր հանրապետական կոնգրեսական Ջո Ուիլսոնը, սակայն այն Սենատում չստացավ անհրաժեշտ աջակցությունը։ Դեմոկրատ կոնգրեսական Սթիվ Քոենը սեպտեմբերի 11-ին Հելսինկյան հանձնաժողովում հայտարարել էր, որ «Ընկերության ակտը» չի ընդունվելու։ «Ցավալի է, որ Սենատը չընդունեց և չի ընդունի «Ընկերության ակտը», որոշ խնդիրներ կային, և հնարավոր է՝ դա կապված է մեկ կոնկրետ խոշոր բիզնեսի հետ, որը առնչվում է նավահանգստին։ «Ընկերության ակտը» մերժելու հնարավորությունը միայն մեկ մարդ ուներ», – ասել է Սթիվ Քոենը։

Դրանից հետո, երբ «Միացյալ ազգային շարժման» առաջնորդները հանդիպել էին Ջո Ուիլսոնի հետ, Թինա Բոկուչավան հայտարարել էր, որ «ակտիվ քննարկումներ են ընթանում, այդ թվում՝ Սենատում, որպեսզի «Ընկերության ակտը» կցվի Պաշտպանության ակտին»։

Նույն հարցի մասին գրել էր նաև «The Hill» պարբերականը։ Մասնավորապես, հոդվածում նշվում էր, որ Սենատում «Ընկերության ակտի» կողմնակիցները փորձում են ճանապարհ գտնել դրա ընդունման համար։ Սենատոր Ռոջեր Ուիքերը «The Hill»-ին հայտնել էր, որ «Ընկերության ակտը» կարող է ավելացվել Պաշտպանության լիազորումների ակտին՝ որպես փոփոխություն։

«Ընկերության ակտը» նախատեսում էր պատժամիջոցներ և վիզային սահմանափակումներ Վրաստանի բարձրաստիճան պաշտոնյաների համար։