ԱՄՆ-ի առողջապահության քարտուղար Ռոբերտ Քենեդին հայտարարել է, որ հղիության ընթացքում ցավազրկող «Տայլենոլ» դեղամիջոցի (այսինքն՝ պարացետամոլի) օգտագործման և աուտիզմի միջև կապի վերաբերյալ ապացույցները բավարար չեն, սակայն այն պետք է կիրառվի զգուշությամբ։

«Հղիության ընթացքում «Տայլենոլ» օգտագործելու և պերինատալ շրջանի հետ պատճառահետևանքային կապը դեռ բավարար չէ հաստատելու համար, որ այն իրականում առաջացնում է աուտիզմ, սակայն նման հավանականությունը մեծ է։ Հետևաբար անհրաժեշտ է զգուշությամբ մոտենալ այս հարցին», – հայտարարել է Ռոբերտ Քենեդին լրագրողների հետ զրույցում։

Քենեդին այս հայտարարությունն արել է այն բանից հետո, երբ Տեխաս նահանգը դատական հայց է ներկայացրել «Տայլենոլ»-ի արտադրողի դեմ։

Սեպտեմբերին ԱՄՆ նախագահ Դոնալդ Թրամփը հայտարարել էր «Տայլենոլ»-ի (պարացետամոլի) և աուտիզմի միջև կապի մասին՝ առանց որևէ գիտական ապացույց ներկայացնելու։ Ավելի ուշ ԱՀԿ-ն նշել էր, որ աուտիզմի և հղիության ընթացքում պարացետամոլի օգտագործման միջև կապի վերաբերյալ գիտական հիմքեր գոյություն չունեն։