Ուկրաինայի ազգային անվտանգության և պաշտպանության խորհրդի քարտուղար Ալեքսեյ Դանիլովը հայտարարել է, որ Վրաստանի և Մոլդովայի տարածքների ազատումը ռուսական ուժերից Ուկրաինայի գործը չէ։

Այս մասին Ալեքսեյ Դանիլովն ասել է «Ազատություն» ռադիոկայանին տված հարցազրույցում։

Նրա խոսքով՝ Վրաստանն ու Մոլդովան պետք է ազատվեն ռուսական ազդեցությունից և իրենց տարածքում ռուսական ռազմական ուժերից՝ առանց Ուկրաինայի մասնակցության։

Դանիլովը «տարօրինակ» է անվանել Վրաստանի նախագահի հայտարարությունը, թե Ռուսաստանի հետ ապագա խաղաղության համաձայնագրում պետք է կետ ներառվի, որ Ռուսաստանը հրաժարվում է վրացական տարածքների օկուպացումից։

«Հետո ասացիք, որ դրանք ձեր տարածքները չեն, բայց հրապարակավ ասացիք, որ ամբողջ աշխարհը լսի։ Այս բյուզանդական մոտեցումը, որը մինչ այժմ կար քաղաքականության մեջ, պետք է մնա անցյալում»,- ասել է ուկրաինացի բարձրաստիճան պաշտոնյան։

Դանիլովը նաև նշել է, որ այն երկրներում, որտեղ կա ռուսական ազդեցություն և ռուսական ռազմական ուժեր, պատշաճ զարգացում տեղի չի ունենա։

«Դրա օրինակն է Մոլդովան, որը երկար ժամանակ օկուպացված է Ռուսաստանի Դաշնության կողմից։ Մենք չենք տեսնում, որ այս տարածքը զարգացման որեւէ հեռանկար կունենա, քանի դեռ չի ազատվել ռուս օկուպանտներից։ Դրա օրինակը Վրաստանն է։ 2008 թվականին, երբ այս ահաբեկիչները նույնպես մտան Վրաստանի տարածք և գրավեցին Վրաստանի մի մասը, սա նմանատիպ իրավիճակ է։ Այս տարածքը բացարձակապես ավերված է, այն չի զարգանում և զարգացման հեռանկարներ չի ունենա, քանի որ ոչ ոք գումար չի ներդնի այնպիսի տարածքում, որտեղ տարածքային խնդիր սահմանված չէ»,- ասել է Դանիլովը։