Սերբիայի Հանրապետության նախագահ Ալեքսանդր Վուչիչը շնորհակալություն է հայտնում Վրաստանի վարչապետ Իրակլի Կոբախիձեին՝ Վրաստան կատարած պաշտոնական այցի ընթացքում ջերմ հյուրընկալության համար։

Վրաստանի կառավարության վարչակազմի տեղեկություններով՝ Ալեքսանդր Վուչիչն ուշադրություն է հրավիրում երկրի արձանագրած առաջընթացին և Վրաստանի կառավարության ղեկավարին հրավիրում Բելգրադ։

«Անկեղծ շնորհակալություն եմ հայտնում այն բացառիկ և չափազանց ջերմ հյուրընկալության համար, որը Դուք և Ձեր թիմը ցուցաբերեցիք իմ և իմ պատվիրակության նկատմամբ Վրաստան կատարած պաշտոնական այցի ընթացքում։ Մեր երկու ժողովուրդների ջերմությունն ու եղբայրական հարաբերություններն առանձնահատուկ կերպով զգացվում էին իմ այցի յուրաքանչյուր փուլում։ Սերբիայի Հանրապետությունը և Վրաստանը պարզապես երկու երկրներ չեն, որոնք հաջողությամբ զարգացնում են երկկողմ հարաբերությունները։ Մեզ միավորում են ընդհանուր արժեքները, մենք ունենք նմանատիպ պատմություն, որը դարերի ընթացքում միահյուսված է եղել միմյանց հետ, և որի հիմքը հանդիսանում է ուղղափառ քրիստոնեությունը, որը դիմակայել է ժամանակի ամենածանր փորձություններին։ Ինձ վրա մեծ տպավորություն թողեց այն արագ առաջընթացն ու զարգացումը, որին հասնում է Ձեր երկիրը, ինչպես նաև առաջնորդների ու կառավարության հաստատակամ ցանկությունը՝ բոլոր ջանքերն ուղղել Վրաստանի հետագա հաջողություններին և շոշափելի արդյունքների ձեռքբերմանը։ Միևնույն ժամանակ, անկեղծորեն ուրախ եմ և հպարտ Ձեր հաջողություններով, քանի որ հենց դրան են արժանի Ձեր երկիրն ու քաղաքացիները։

Խորապես համոզված եմ, որ մեր համագործակցության ամենակարևոր ձեռքբերումները դեռ առջևում են, ինչը օգուտ կբերի ինչպես մեր երկրների գործարար շրջանակներին, այնպես էլ մեր քաղաքացիներին, ովքեր միմյանց նկատմամբ աչքի են ընկնում առանձնահատուկ բարյացակամությամբ և ընկերական վերաբերմունքով։ Դա հատկապես հստակ զգացվում էր այն ժամանակահատվածում, որը Դուք այդքան առատաձեռնորեն տրամադրեցիք ինձ և իմ պատվիրակությանը։ Նախքան հոկտեմբերին Բելգրադում Ձեզ կհյուրընկալեմ որպես թանկագին հյուրի և եղբոր, օգտվում եմ առիթից՝ ևս մեկ անգամ Ձեզ ամենայն բարիք մաղթելու և իմ սրտագին հարգանքը հավաստելու համար»,- նշում է Ալեքսանդր Վուչիչը։