Վրաստանի արտաքին գործերի նախարար Մակա Բոչորիշվիլու և Ադրբեջանի արտաքին գործերի նախարար Ջեյհուն Բայրամովի միջև տեղի է ունեցել հեռախոսազրույց։

Ադրբեջանի արտաքին գործերի նախարարության տվյալներով՝ նախարարները քննարկել են երկու երկրների միջև բարեկամական և ռազմավարական գործընկերության հարաբերությունների ներկա վիճակը և հեռանկարները։ Ընդգծվել է, որ երկրների միջև բարձր մակարդակի վրա գտնվող քաղաքական երկխոսությունը և իրականացված ինտենսիվ այցերը նպաստել են հարաբերությունների հետագա ամրապնդմանը։

Զրույցի ընթացքում շեշտվել է, թե որքան կարևոր է բարձր մակարդակի քաղաքական շփումների հետագա ընդլայնումը գալիք տարում։

«Կողմերը քննարկել են տարածաշրջանում առևտրի և կապի հարցեր և ողջունել այս ուղղությամբ գործադրած ջանքերը։ Նախարարները գոհունակությամբ նշել են ադրբեջանական նավթամթերքների Հայաստանի արտահանման հարցում Վրաստանի տարածքով անցնելու սակագների շուրջ ձեռք բերված պայմանավորվածությունը և ընդգծել են այս ուղղությամբ շարունակական աշխատանքի կարևորությունը։ Նախարար Ջեյհուն Բայրամովը շնորհակալություն է հայտնել Վրաստանի ղեկավարությանը հարցի ժամանակին լուծման համար։ Բացի այդ, կողմերը փոխանակվել են կարծիքներով մի շարք երկկողմ և տարածաշրջանային հարցերի շուրջ։ Նախարարները անկեղծ շնորհավորանքներ են փոխանցել միմյանց գալիք Նոր տարվա առթիվ և վստահություն հայտնել, որ գալիք տարում երկու երկրների հարաբերությունները կդառնան էլ ավելի ամուր», – ասված է հայտարարության մեջ։