Իրավապահները ընդհատակյա նարկոլաբորատորիա են հայտնաբերել, առգրավվել է մինչև 20 կիլոգրամ տարբեր տեսակի թմրամիջոց, ձերբակալվել է երկու անձ
Ներքին գործերի նախարարության Թբիլիսիի ոստիկանության դեպարտամենտի Վակե-Սաբուրթալոյի գլխավոր վարչության աշխատակիցները, իրականացված ոստիկանական միջոցառումների արդյունքում, հայտնաբերել են ընդհատակյա նարկոլաբորատորիա և նարկոհանցագործության մեղադրանքով ձերբակալել Ղազախստանի Հանրապետության երկու քաղաքացու։ Այս մասին տեղեկատվություն է տարածում Ներքին գործերի նախարարությունը։
Գերատեսչության տվյալներով՝ հետաքննությունն ընթանում է Քրեական օրենսգրքի 266-րդ և 260-րդ հոդվածներով, ինչը նախատեսում է մինչև 20 տարի ժամկետով կամ ցմահ ազատազրկում։
«Հետաքննությամբ պարզվել է, որ մեղադրյալները, հետագա իրացման նպատակով, ժամանակավոր բնակության վայրում կազմակերպված այսպես կոչված լաբորատորիայում, տարբեր քիմիական միջոցների և պրեկուրսորների կիրառմամբ, պատրաստում էին թմրամիջոցներ։ Քրեական գործով ձեռք բերված ապացույցներով հաստատվում է նաև, որ մեղադրյալները ընդհատակյա թմրանյութերի իրացումն իրականացնում էին տարբեր մեթոդներով։
Ոստիկանությունը ձերբակալվածների անձնական և ժամանակավոր բնակության վայրի խուզարկության արդյունքում որպես իրեղեն ապացույց առգրավել է առանձնապես խոշոր չափի՝ մինչև 20 կիլոգրամ քաշով տարբեր տեսակի թմրամիջոցներ։ Քննչական գործողությունների արդյունքում առգրավվել են նաև թմրամիջոցների ընդհատակյա պատրաստման և փաթեթավորման համար անհրաժեշտ նյութեր»,- նշված է Ներքին գործերի նախարարության տարածած տեղեկատվության մեջ։