Վրաստանի խորհրդարանը Հանրային հեռարձակողի հոգաբարձուների խորհրդի անդամներ է ընտրել Գրիգոլ Մուրղուլիային և Դավիթ Քարթվելիշվիլիին

Վրաստանի խորհրդարանը Հանրային հեռարձակողի հոգաբարձուների խորհրդի երկու անդամ է ընտրել՝ Գրիգոլ Մուրղուլիային և Դավիթ Քարթվելիշվիլիին։

Գրիգոլ Մուրղուլիան առաջադրվել էր «Վրացական երազանք» խմբակցության կողմից․ նրա թեկնածությանը կողմ է քվեարկել 82 պատգամավոր, 4-ը՝ դեմ։

«Ժողովրդի ուժի» թեկնածու Դավիթ Քարթվելիշվիլին հոգաբարձուների խորհրդի անդամ է ընտրվել 83 կողմ ձայնով։

Բացի այդ, քվեարկության են դրվել «Վրաստանի համար» խմբակցության կողմից առաջադրված երեք թեկնածուները՝ Թեա Գեգենավան (12 կողմ, 5 դեմ), Էլիսո Գաբադաձեն (12 կողմ, 8 դեմ), Թեյմուրազ Կեկելիձեն (12 կողմ, 7 դեմ), սակայն նրանք չեն ստացել անհրաժեշտ քանակությամբ ձայներ։

«Այս օրերի ընթացքում դեռևս գործում է գործող կանոնակարգը, և անցկացվում են նաև լիագումար նիստեր։ Գործող կանոնակարգի համաձայն՝ դուք կարող եք ներկայացված երեք թեկնածուներից ևս մեկ անգամ անվանել հոգաբարձուի թեկնածուին։ Այս դեպքում նրան ընտրելու համար բավարար է 50 ձայնը։ Եթե գտնեք, որ ունեք նման ցանկություն, կարող եք առաջադրել թեկնածուին, և նրա ընտրության համար բավարար կլինի 50 ձայնը։ Հակառակ դեպքում՝ հուլիսի 1-ից ուժի մեջ կմտնեն նոր կանոնները, որոնց համաձայն՝ առանց հանձնաժողովի կկարողանաք առաջադրել նույն կամ այլ թեկնածուների»,- հայտարարել է Շալվա Պապուաշվիլին։